’سرکاری ملازمت کے لیے ہندوستان کے نوجوانوں کو کب تک صبر رکھنا ہوگا؟‘ ورون گاندھی کا بی جے پی حکومت سے سوال

بی جے پی رکن پارلیمنٹ ورون گاندھی نے جمعرات کو ایک بار پھر ملازمت اور پیپر لیک پر اپنی ہی حکومت پر سوال اٹھائے ہیں۔ انھوں نے کہا کہ پہلے تو سرکاری ملازمت نہیں ہوتی اور کچھ مواقع ملتے ہیں تو پیپر لیک ہو جاتے ہیں۔ انھوں نے سوال کیا کہ ہندوستان کے نوجوانوں کو کب تک صبر رکھنا ہوگا؟ پیلی بھیت سے بی جے پی رکن پارلیمنٹ ورون گاندھی کسانوں کی تحریک، لکھیم پور کھیری وقعہ جیسے ایشوز پر اپنی ہی پارٹی کی حکومت پر لگاتار سوال اٹھا رہے ہیں۔

ورون گاندھی نے جو تازہ ٹوئٹ کیا ہے اس میں لکھا ہے ’’پہلے تو کوئی سرکاری ملازمت نہیں ہے، کوئی موقع آتا ہے تو پیپر لیک ہو جاتا ہے۔ اگر آپ امتحان دیتے ہیں تو سالوں تک کوئی ریزلٹ نہیں ہوتا ہے۔ تو یہ کسی گھوٹالے میں رد ہو جاتا ہے۔ 1.25 کروڑ نوجوان دو سال سے ریلوے گروپ ڈی امتحان کا انتظار کر رہے ہیں۔ فوجی بھرتی کے ساتھ بھی ایسا ہی ہے۔ ہندوستان کے نوجوانوں کو کب تک صبر رکھنا چاہیے۔‘‘

اتوار کو پیپر لیک ہونے کے بعد یو پی ٹی ای ٹی 2021 کو رد کرنا پڑا تھا۔ انھوں نے پیر کے روز ٹوئٹ کیا تھا کہ ’’یو پی ٹی ای ٹی امتحان کا پیپر لیک ہونا لاکھوں نوجوانوں کے مستقبل کے ساتھ کھلواڑ کر رہا ہے۔ اس دلدل کی چھوٹی مچھلی پر کارروائی سے کام نہیں بنے گا، حکومت کو چاہیے کہ ان کے سیاسی محافظ ایجوکیشن مافیا کے خلاف سخت کارروائی کرے۔ بیشتر تعلیمی ادارے سیاسی طور سے بااثر لوگوں کے ہاتھوں میں ہیں، ان کے خلاف کب کارروائی کی جائے گی؟‘‘

واضح رہے کہ اکتوبر میں ورون گاندھی اور ان کی ماں مینکا گاندھی کو بی جے پی کی قومی مجلس عاملہ سے ہٹا دیا گیا تھا۔ لکھیم پور کھیری واقعہ کے بعد ورون گاندھی نے کہا تھا کہ اسے ہندو بنام سکھ لڑائی میں بدلنے کی کوشش کی جا رہی ہے۔