تقریباً ایک سال کے صدر راج کے بعد منی پور کو ملا نیا وزیر اعلیٰ، یمنام کھیم چند سنگھ نے لیا حلف

تشدد زدہ منی پور کو طویل صدر راج کے بعد اپنا نیا وزیر اعلیٰ مل گیا۔ مارشل آرٹ کے ماہر میتئی برادری کے یمنام کھیم چند سنگھ نے ریاست کے نئے وزیر اعلیٰ کے طور پر بدھ (4 فروری) کو حلف لے لیا۔ اس سے قبل انہوں نے منی پور کے گورنر سے مل کر حکومت بنانے کا دعویٰ پیش کیا تھا۔ یمنام کی حلف برداری کے ساتھ ساتھ کچھ دیگر لیڈران نے بھی اہم وزارتوں کا حلف لیا۔ بی جے پی رکن اسمبلی نیمچا کیپگین نے منی پور کے نائب وزیر اعلیٰ کے عہدہ کا حلف لیا، جو کوکی برادری سے تعلق رکھتے ہیں۔ اس کے علاوہ ناگا پیپلز فرنٹ کے رکن اسمبلی ایل ڈِکھو نے بھی نائب وزیر اعلیٰ کے عہدہ کے طور پر حلف لیا ہے۔ بی جے پی کے گوونداس کونتھوجم اور این پی پی کے لوکین سنگھ نے بطور وزیر حلف لیا۔ نیمچا نے نئی دہلی واقع منی پور بھون سے ڈیجیٹل طور پر حلف لیا۔

وزیر اعلیٰ کے طور پر حلف لینے کے بعد کھیم چند نے نامہ نگاروں سے بات چیت کی۔ اس دوران انہوں نے کہا کہ ’’منی پور ’ترقی یافتہ ہندوستان 2047‘ میں اہم کردار ادا کرے گا۔ منی پور میں 36 برادریاں ہیں اور ہم ریاست میں پرامن ماحول لانے کی امید کرتے ہیں۔‘‘ واضح رہے کہ منگل (3 فروری) کو قانون ساز پارٹی کی میٹنگ ہوئی تھی، جس میں کھیم چند (62 سال) کو بی جے پی قانون ساز کونسل کا لیڈر منتخب کیا گیا تھا۔ قومی راجدھانی دہلی میں پارٹی کے ہیڈکوارٹر میں بی جے پی قانون ساز کونسل کی ڈیڑھ گھنٹے میٹنگ چلی، جس میں کھیم چند کے نام پر اتفاق رائے ہوا تھا۔ مرکزی وزیر داخلہ امت شاہ، بی جے پی صدر نتن نوین، سپروائزر ترون چگھ کی موجودگی میں بی جے ہیڈکوارٹر میں تفصیل سے ہوئی قانون ساز کونسل میٹنگ میں کئی ناموں پر تبادلہ خیال کیا گیا تھا۔

واضح رہے کہ منی پور میں آئندہ سال مارچ میں ہی اسمبلی انتخاب ہونے ہیں۔ ایسے میں نئے وزیر اعلیٰ کے سامنے سب سے بڑا چیلنج میتئی بنام کوکی لڑائی کے درمیان ایسا توازن برقرار رکھنا ہے، جس سے اسمبلی انتخاب میں بی جے پی کو نقصان نہ ہو۔ پارٹی چاہتی ہے کہ آئندہ انتخاب سے قبل منی پور میں زمینی سطح پر امن بحال ہو۔ قابل ذکر ہے کہ منی پور میں فروری 2025 سے صدر راج نافذ تھا۔ مئی 2023 میں میتئی اور کوکی برادریوں کے درمیان پھوٹ پڑے نسلی تشدد کو کنٹرول کرنے کے متعلق تنقید کے درمیان اس وقت کے وزیر اعلیٰ این بیرن سنگھ کے استعفیٰ کے بعد صدر راج نافذ کیا گیا تھا۔ 12ویں منی پور قانون ساز اسمبلی کا ساتواں اجلاس 6 فروری سے شروع ہونے کا امکان ہے۔