اتراکھنڈ: چمولی میں کار 300 میٹر گہری کھائی میں گری، 5 افراد کی موت

اتراکھنڈ کے چمولی ضلع میں ایک بڑا سڑک حادثہ پیش آیا ہے۔ یہاں برہی-نجمولا شاہراہ پر گاڑی گاؤں کے قریب ایک کار کے 300 میٹر گہری کھائی میں گر جانے سے 5 لوگوں کی موت ہو گئی۔ یہ حادثہ جمعہ کو شام تقریباً 6:30 بجے ہوا۔ اطلاع ملنے پر چمولی تھانہ سے پولیس موقع پر پہنچی جس کے بعد راحت اور بچاؤ کام شروع کیا گیا۔

چمولی کے سینئر ایس پی سرویش پنوار نے بتایا کہ چمولی تھانہ کو اطلاع ملی کہ سیاہ رنگ کی ایک آلٹو کے-10 کار جس کا رجسٹریشن نمبر یو۔کے 11 بی 3638 ہے، نجمولا گھاٹی کے گاڑی گاؤں کے قریب سڑک سے نیچے گر گئی۔ یہ کار پگنا گاؤں میں ایک شادی کی تقریب سے لوٹ رہی تھی۔ اسی دوران ڈرائیور اس پر سے توازن کھو بیٹھا اور کار سڑک سے اتر کر تقریباً 300 میٹر گہری کھائی میں جا گری۔

پولیس افسر نے بتایا کہ کار میں پانچ لوگ سوار تھے۔ یہ گولم گاؤں کے رہنے والے تھے۔ ان سبھی کی موقع پر ہی موت ہو گئی۔ مہلوکین کی شناخت ابھی نہیں ہو سکی ہے۔ پولیس افسر نے بتایا کہ حادثے کی چھان بین جاری ہے۔ پولیس کی جانچ ٹیم یہ پتہ لگانے کی کوشش کر رہی ہے کہ حادثے کی اصل وجہ کیا تھی۔

واضح رہے کہ ابھی 12 اپریل کو ہی ٹہری گڑھوال ضلع کے دیو پریاگ کے پاس الکنندہ ندی میں مہندرا تھار سڑک سے اتر کر 200 میٹر کی گہرائی میں گر گئی تھی۔ اس حادثے میں ایک ہی کنبہ کے چار اراکین سمیت پانچ لوگوں کی موت ہو گئی تھی۔ معلوم ہو کہ اتراکھنڈ میں ہر سال 1000 سے زیادہ سڑک حادثے ہوتے ہیں۔ پہاڑی علاقوں میں خطرناک، گھماؤدار اور تنگ سڑکیں اکثر خچرے کو بڑھا دیتی ہیں۔ خاص کر مانسون اور سردیوں کے موسم میں خراب حد نظر کی وجہ سے سڑکوں پر سفر کرنا بے حد خطرناک ہو جاتا ہے۔