بالی ووڈ چھوڑنے کے سوال پر بولیں اُرمیلا، انڈسٹری میں دھماکے دار واپسی کے لیے تیار!

 اُرمیلا ماتونڈکرکے گزشتہ 5 سال سے زیادہ عرصے سے پردہ سیمیں سے غائب رہنے کی وجہ سے مسلسل قیاس آرائیاں کی جاتی رہیں کہ انہوں نے بالی ووڈ چھوڑ دیا ہے لیکن اب اُرمیلا نے ان تمام افواہوں کا خاتمہ کر دیا ہے۔ معروف اداکارہ کا کہنا ہے انہوں نے کبھی اداکاری چھوڑی ہی نہیں بلکہ وہ ایسے کرداروں کا انتظار کر رہی تھیں جو ان کی صلاحیتوں کے ساتھ انصاف کرسکیں۔

اُرمیلا نے انکشاف کیا کہ اب انہیں ایک بار پھر اچھی اور دلچسپ پیشکشیں موصول ہو رہی ہیں۔ وہ جلد ہی اوٹی ٹی پلیٹ فارم پر بھی ڈیبیو کرنے والی ہیں۔ اُرمیلا نے پرجوش انداز میں کہا کہ اب پھرسے سیٹ پر واپس آنے اور زبردست واپسی کرنے کا وقت آگیا ہے۔

’ایچ ٹی‘ کے ساتھ بات چیت میں اُرمیلا نے بتایا کہ کیا انہوں نے واقعی بالی ووڈ چھوڑ دیا تھا؟۔ ’بلیک میل‘ کے بعد اُرمیلا 2022 میں ڈی آئی ڈی سپر مامس سیزن 3 میں جج کے طور پر نظر آئی تھیں لیکن وہ کوئی مکمل اداکاری کا پروجیکٹ نہیں تھا۔ جب ان سے پوچھا گیا کہ لوگوں کو کیوں لگتا ہے کہ وہ اب کام نہیں کرنا چاہتیں، تو اُرمیلا نے واضح طور پر کہا کہ میں ہمیشہ سے اپنے کام کے بارے میں سلیکٹیو رہی ہوں، اگر لوگ سمجھتے ہیں کہ میں فلمیں نہیں کر رہی ہوں تو میں انہیں قصوروار نہیں ٹھہرا سکتی لیکن سچ یہ ہے کہ میں نے کبھی اداکاری نہیں چھوڑی۔

اُرمیلا نے بتایا کہ وہ اوٹی ٹی پلیٹ فارمز کے بارے میں بہت پرجوش ہیں کیونکہ وہ نئے کرداروں اور انواع کو دریافت کرنے کا موقع فراہم کرتے ہیں۔ انہوں نے کہا کہ اوٹی ٹی نے اداکاروں کے لیے نئی دنیا کھول دی ہے۔ ایسے جذبات اور کردار ہیں جن کی پہلے تلاش نہیں کی گئی تھی۔ انہوں نے یہ بھی انکشاف کیا کہ وہ ایک اوٹی ٹی شو کی شوٹنگ پوری کرچکی ہیں جو شاید اگلے سال ریلیز ہو گا۔

 1991 میں ’نرسنہا‘ سے مرکزی اداکارہ کے طور پر ڈیبیو کرنے والی اُرمیلا نے رنگیلا، جدائی، ستیہ، کون، بھوت اور پنجر جیسی یادگار فلموں میں کام کیا ہے۔ اپنے کیرئیر کو یاد کرتے ہوئے وہ کہتی ہیں کہ میری سب سے بڑی کامیابی یہی رہی کہ میں ایک ہی قسم کے کردار میں کبھی نہیں پھنسی۔ میں نے خود کو توڑا اور ہر بار ایک نئی امیج بنائی۔

اُرمیلا تسلیم کرتی ہیں کہ انڈسٹری میں تنخواہوں کا ڈھانچہ 90 کی دہائی کے مقابلے میں بہتر ہوا ہے لیکن انہوں نے یہ بھی کہا کہ انہیں اپنی فیس کے بارے میں کبھی شکایت نہیں رہی۔ انہوں نے کہا کہ میں اس دور کی سب سے زیادہ معاوضہ لینے والی اداکاراؤں میں سے ایک تھی۔ کچھ فلموں میں مجھے اپنے مرد ساتھی اداکاروں سے زیادہ معاوضہ دیا گیا تھا۔ ان کا ماننا ہے کہ تنخواہوں میں تفاوت جیسے مسائل کو صرف ایک نقطہ نظر سے نہیں دیکھنا چاہیے کیونکہ گزشتہ 30 سالوں میں پوری صنعت بدل چکی ہے۔