گروگرام کے بسئی چوک میں شدید آتشزدگی، 100 سے زیادہ جھگیاں جل کر خاک

گروگرام کے بسئی چوک کے پاس موجود جھگیوں میں آج صبح 6 بجے آگ لگ گئی۔ تیز ہوا کی وجہ سے آگ نے کچھ منٹ میں ہی شدید شکل اختیار کر لی اور آس پاس کی 100 سے زیادہ جھگیوں کو اپنی لپیٹ میں لیتے ہوئے انہیں خاکستر کر دیا۔ آگ لگنے پر یہاں رہنے والے لوگ فوری طور پر باہر آ گئے، اس سے کوئی جانی نقصان نہیں ہوا۔ فائر بریگیڈ کی 10 سے زیادہ ٹیموں نے تین گھنٹے میں بڑی مشکل سے آگ پر قابو پایا۔

سیکٹر 37 فائر اسٹیشن افسر نے بتایا کہ صبح 6 بجے بسئی چوک پر جھگیوں میں آگ لگنے کی اطلاع ملی۔ اس پر یہاں فائر بریگیڈ کی گاڑیاں بھیجی گئیں۔ آگ کافی تیز لگی تھی، اس لیے بھیم نگر، ادیوگ وِہار فائر اسٹیشن سے بھی فائر بریگیڈ کی گاڑیاں بلانی پڑی۔ تقریباً تین گھنٹے کے بعد صبح پونے نو بجے آگ پر قابو پا لیا گیا۔ آگ کو بجھانے میں تینوں فائر اسٹیشنوں سے 15 سے زیادہ گاڑیاں موقع پر پہنچیں۔ فائر اسٹیشن نے بتایا کہ آگ سے کوئی جانی نقصان نہیں ہوا ہے۔

بتایا جاتا ہے کہ سول ڈیفنس نے فائربریگیڈ کے اہلکاروں کے ساتھ مل کر سب سے پہلے لوگوں کو محفوظ طور پر گھروں سے باہر نکالنے پر توجہ دی۔ جس کی وجہ سے ایک بڑا حادثہ ہونے سے ٹل گیا اور سبھی لوگوں کو محفوظ طور پر بچا لیا گیا ہے۔

فی الحال آگ لگنے کی اصل وجہ کا پتہ نہیں چل سکا ہے۔ ابتدائی جانچ میں شارٹ سرکٹ کو آگ لگنے کی وجہ مانا جا رہا ہے لیکن اس کی سرکاری طور پر تصدیق نہیں ہوئی ہے۔ فائر محکمہ اور مقامی انتظامیہ نے معاملے کی جانچ شروع کر دی ہے تاکہ اس حادثے کی وجہ کا پتہ چل سکے۔ متاثر لوگوں کے لیے راحت اور امدادی انتظام بھی کیا جا رہا ہے۔