ہر ضرورت مند کو سماجی سیکورٹی کا حق، مرکز اسے پورے ملک میں نافذ کرے: اشوک گہلوت

راجستھان کے وزیر اعلیٰ اشوک گہلوت نے مرکز سے مطالبہ کیا ہے کہ پورے ملک میں سماجی سیکورٹی کا نفاذ ہو کیونکہ یہ ہر ضرورت مند کا حق ہے۔

اشوک گہلوت، تصویر آئی اے این ایس
اشوک گہلوت، تصویر آئی اے این ایس
user

قومی آوازبیورو

راجستھان کے وزیر اعلیٰ اشوک گہلوت نے مرکز کی مودی حکومت سے مطالبہ کیا ہے کہ پورے ملک میں سماجی سیکورٹی کا نفاذ ہو کیونکہ یہ ہر ضرورت مند کا حق ہے۔ ریاستی حکومت ہر اہل شخص کو سماجی سیکورٹی فراہم کرنے کے لیے پرعزم ہے اور اسپتالوں میں مفت دوائیں اور علاج اسی کا حصہ ہیں۔ انھوں نے کہا کہ سبھی ریاستوں کے لیے اسے نافذ کرنے کا وقت آ گیا ہے اور مرکزی حکومت سے سبھی اہل لوگوں کو سماجی سیکورٹی فراہم کرنے کی گزارش کی۔

وزیر اعلیٰ نے کہا کہ یو پی اے حکومت تعلیم کا حق، روزگار کا حق اور فوڈ سیکورٹی کا حق لے کر آئی، جو اس سمت میں شروعاتی اقدام تھے۔ انھوں نے کہا کہ راجستھان سبھی کے لیے صحت کوریج کو نافذ کرنے میں ملک میں سرفہرست ریاست بن گئی ہے۔ ’مکھیہ منتری چرنجیوی سواستھ بیمہ یوجنا‘ سے ریاست میں 1.34 کروڑ سے زیادہ کنبوں کے جڑنے سے کڈنی، دل، لیور وغیرہ امراض کا مہنگا علاج اب مفت ہو رہا ہے۔


’مفت نروگی راجستھان یوجنا‘ کے تحت 5000 سے زیادہ دواؤں، سرجری اور ٹانکے کو فہرست بند کرنے کی کارروائی کی جا رہی ہے۔ ساتھ ہی سبھی اسپتالوں میں کیش لیس علاج کا انتظام کیا گیا ہے۔ اس کے لیے اسپتالوں میں ضروری دواؤں اور جانچ کی اضافی سہولیات یقینی بنائی جا رہی ہیں۔ اس منصوبہ کے تحت اب تک 72000 سے زیادہ کینسر مریضوں اور 35000 سے زیادہ امراض قلب سے متاثر افراد کا علاج کیا جا چکا ہے اور 11 لاکھ سے زیادہ مریضوں کو مفت علاج فراہم کیا جا چکا ہے۔ ریاستی حکومت نے مئی 2021 سے اب تک 1400 کروڑ روپے سے زیادہ خرچ کیے ہیں۔ منصوبہ کے تحت بیمہ کور کو 5 لاکھ روپے سے بڑھا کر 10 لاکھ روپے کر دیا گیا ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


;