’کورونا سے ہلاک ہونے والوں کے لیے پی ایم مودی کے پاس فنڈ نہیں، فضول خرچی کے لیے کروڑوں روپے موجود‘

دہلی حکومت کے سابق وزیر ہارون یوسف نے آج اپنے ایک بیان میں کہا کہ کووڈ وبا سے متاثر لوگوں کے ساتھ مرکز کی بی جے پی حکومت اور دہلی کی کیجریوال حکومت کھلواڑ اور دھوکہ کر رہی ہے۔ انھوں نے کہا کہ ڈبلیو ایچ او نے کووڈ کو عالمی وبا قرار دیا، لیکن حکومت ہند نے اسے قدرتی آفت مانا ہے اور مرکزی حکومت نے این ڈی آر ایف کے تحت 4 لاکھ روپے معاوضہ دینے کی بات قبول کرنے کے باوجود سپریم کورٹ میں حلف نامہ دے کر کووڈ سے ہلاک ہونے والے شخص کے کنبہ کو 4 لاکھ روپے کی امداد نہیں دینے کی بات کہی جس سے لوگوں کے تئیں اس کا عوام مخالف چہرہ صاف ظاہر ہو گیا ہے۔

ہارون یوسف نے یہ باتیں ریاستی صدر دفتر راجیو بھون میں ایک پریس کانفرنس کے دوران کہیں۔ انھوں نے کہا کہ کانگریس کے سابق صدر راہل گاندھی نے 21 جون کو ٹوئٹ کر کے کہا تھا کہ ’زندگی کی قیمت لگانا ناممکن ہے، سرکاری معاوضہ صرف ایک چھوٹی سی مدد ہوتی ہے، لیکن مودی حکومت یہ بھی دینے کو تیار نہیں۔‘ راہل گاندھی کی یہ بات حقیقت پر مبنی ہے۔ نامہ نگاروں سے خطاب کرتے ہوئے ہارون یوسف نے کہا کہ مودی حکومت اور کیجریوال حکومت کے ذریعہ کووڈ متاثرین کو راحت اور معاوضہ دینے کے لیے بڑے بڑے اعلانات کیے گئے اور لوگوں سے جھوٹی ہمدردی ظاہر کر کے ان کی زندگی سے کھلواڑ کرنے کا کام کیا گیا جو ناقابل برداشت ہے۔

اپنی بات کو آگے بڑھاتے ہوئے ہارون یوسف نے کہا کہ کیجریوال نے کووڈ وبا میں لوگوں کی جان بچانے کے لیے کچھ کرنے کی جگہ متاثرین کو بھگوان بھروسے چھوڑ دیا تھا۔ کووڈ مہلوکین اور کووڈ متاثرین کو راحت پہنچانے کے لے 4 لاکھ معاوضہ کی جگہ صرف 50 ہزار ان کے اہل خانہ کو اور 2500 روپے ان کے پسماندگان کو دینے کے لیے نوٹیفکیشن جاری کر کے دہلی کے باشندوں کے ساتھ دھوکہ کیا ہے۔ انھوں نے مزید کہا کہ کانگریس پارٹی اس عالمی وبا میں کووڈ اور آکسیجن کی کمی سے ہوئی موت کی شناخت کے لیے ہائی کورٹ کے ریٹائرڈ جج کی نگرانی میں کمیٹی بنانے کا مطالبہ کرتی ہے، اور ساتھ ہی یہ بھی مطالبہ کرتی ہے کہ کووڈ سے ہوئی ہلاکتوں پر 4 لاکھ روپے اور آکسیجن کی کمی سے ہوئی ہلاکتوں پر 5 لاکھ روپے کی امدادی رقم ان کے اہل خانہ کو دی جائے۔

ہارون یوسف نے اس موقع پر کانگریس صدر سونیا گاندھی کے اس عزم کا اظہار کیا کہ کورونا سے ہوئی حقیقی اموات کو پارٹی کارکنان سامنے لائیں گے۔ انھوں نے کہا کہ دہلی میں کانگریس کارکنان گھر گھر جا کر سروے کریں گے اور دہلی والوں کے سامنے کووڈ سے ہوئی اموات کی صحیح تعداد پیش کریں گے۔ ہارون یوسف نے مرکزی اور دہلی حکومت پر الزام عائد کیا کہ وہ مہلوکین کی اصل تعداد کو چھپا رہی ہے۔ بہار اور یو پی میں بہتی لاشوں اور دہلی میں شمشان گھاٹ میں ادا کی گئی آخری رسومات کے اصل اعداد و شمار کو دونوں حکومتیں چھپا رہی ہیں، جس کی مثال دہلی میں اس سال اپریل-مئی میں 34 ہزار 750 ڈیتھ سرٹیفکیٹ جاری کیا جانا ہے، لیکن سرکاری اعداد و شمار میں صرف 13 ہزار 201 اموات دکھائی گئی ہیں۔ دو مہینوں میں دہلی حکومت نے 21 ہزار 549 اموات کو چھپا دیا۔ ہارون یوسف نے کہا کہ مودی اور کیجریوال حکومت اشتہارات کے ذریعہ سچائی کو چھپانے کا کام کر رہی ہیں۔