پیرس اولمپکس 2024: منو بھاکر سمیت 100 سے زائد کھلاڑیوں کے میڈلز لیے جائیں گے واپس، حیران کن وجہ آئی سامنے

پیرس اولمپک 2024 میں میڈل جیتنے والے کئی کھلاڑیوں نے خراب میڈل ملنے کی شکایت کی ہے۔ وجہ یہ ہے کہ صرف 5 ماہ میں ہی میڈل کا رنگ پھیکا پڑنے لگا ہے۔ اس حوالے سے اولمپک کمیٹی نے تمام کھلاڑیوں کو نئے میڈلز دینے کی بات کہی ہے۔ بتایا جا رہا ہے کہ 100 سے زائد میڈلز بدلے جائیں گے اور اس کے لیے جلد ہی تیاریاں شروع کی جائیں گی۔ ایسا نہیں ہے کہ خراب میڈل کی 5 ماہ بعد شکایت کی گئی ہے۔ امریکی ایتھلیٹ نیاہ ہسٹن نے تو پیرس اولمپک کے دوران ہی اپنے کانسے کے تمغے کے حوالے سے شکایت کر دی تھی۔ انہوں نے کہا تھا کہ ’’یہ اولمپک میڈل تب اچھے لگتے ہیں جب وہ بالکل نئے ہوتے ہیں لیکن اسے تھوڑی دیر کے لیے پسینے کے ساتھ اپنے ہاتھ پر رکھنے اور پھر ویکینڈ میں اپنے دوستوں کو دینے کے بعد اس کی کوالٹی سامنے آتی ہے۔ صرف ایک ہفتہ ہوا ہے۔‘‘

واضح ہو کہ ہندوستان نے پیرس اولمپک میں کُل 6 میڈل جیتے تھے۔ ان میں سے بھی کچھ کھلاڑیوں نے میڈل کو لے کر شکایت کی ہے۔ ہندوستان کی جانب سے شوٹنگ میں کانسہ کا تمغہ جیتنے والے سوپنل کسالے نے کہا کہ ’’کانسہ کا تمغہ جیتنے کے 7 دن کے اندر ہی اس کا رنگ پھیکا پڑ گیا۔ جب میں ہندوستان پہنچا تو دوستوں، کوچوں اور ساتھی نشانے بازوں کا دھیان بھی اس پر گیا۔ اولمپک میڈل نشانے بازوں کے لیے ایک بیش قیمتی وراثت ہوتی ہے اور اس پر سے کوٹنگ ہٹ چکی ہے۔‘‘ شوٹنگ میں ہی کانسہ کا تمغہ جیتنے والے سربجیت سنگھ نے بھی میڈل کا رنگ اترنے کی شکایت کی۔ انہوں نے بتایا کہ ’’اولمپک کے کچھ دنوں بعد میڈل کا رنگ پھیکا پڑ چکا تھا۔ اس حوالے سے متعلقہ حکام سے رابطہ کیا گیا۔‘‘

سربجیت سنگھ نے آگے کہا کہ ’’اولمپک میڈل نوجوانوں کے ساتھ ساتھ موجودہ نشانے بازوں کو بھی اولمپک اعزاز حاصل کرنے کی ترغیب دیتے ہیں اور اس کا رنگ خراب نہیں ہونا چاہیے۔‘‘ ذرائع سے ملی اطلاع کے مطابق پیرس اولمپک میں شوٹنگ میں 2 کانسے کا تمغہ اپنے نام کرنے والی ہندوستان کی اسٹار ایتھلیٹ منو بھاکر کے تمغے کا رنگ بھی پھیکا پڑ چکا ہے۔

قابل ذکر ہے کہ پیرس اولمپک آرگنائزنگ کمیٹی نے ’مونائی ڈے پیرس‘ کو میڈل بنانے کا کنٹریکٹ دیا تھا۔ یہ ایک سرکاری کمپنی ہے جو فرانس کے لیے سکّے اور دیگر کرنسی بھی تیار کرتی ہے۔ ذرائع سے ملی اطلاعات کے مطابق کمپنی آئندہ ہفتے میں ایتھلیٹس کے تمام خراب میڈلز کو بدل دے گی۔ واضح ہو کہ فرانس کی کمپنی ’مونائی ڈے پیرس‘ نے ہر میڈل میں ایفل ٹاور میں لگے لوہے کے ٹکڑے استعمال کیے تھے۔ اس کمپنی نے اولمپک کے کھیلوں کے لیے 5084 گولڈ، سلور اور برانز میڈل بنائے تھے۔