اسمارٹ فون اسکرین کے ’گرین لائن‘ مسئلے کے لیے ون پلس نے متعارف کرائی لائف ٹائم وارنٹی

موبائل کمپنی ’ون پلس‘ نے ہندوستان میں اپنے صارفین کے لیے اسمارٹ فونز کی اسکرینوں میں گرین لائن کے مسئلے کے لیے لائف ٹائم وارنٹی متعارف کرائی ہے۔ یہ قدم اس بات کا غماز ہے کہ ون پلس اپنے صارفین کی ضروریات اور ان کے اعتماد کو بڑھانے کے لیے کوشاں ہے۔

کمپنی کا کہنا ہے کہ اب تک اس بات کا سامنا کرنے والے صارفین کی تعداد زیادہ تھی جو اپنے ڈیوائسز میں ’گرین لائن‘ یعنی اسکرین پر سبز رنگ کی لائن دیکھنے کی شکایت کرتے تھے اور اس کو ٹھیک کرنے کے لیے انہیں اضافی لاگت کا سامنا کرنا پڑتا تھا۔

یہ نیا اقدام ’گرین لائن-وری فری سلوشن‘ کے نام سے جانا جائے گا۔ اس کا مقصد اسکرین کی AMOLED پینلز کو زیادہ مستحکم اور محفوظ بنانا ہے۔ اس کے لیے ون پلس نے جدید پی وی ایکس مٹیریل استعمال کیا ہے جو اسکرین کے کناروں کو مزید مضبوط بناتا ہے اور اس کے ساتھ ہی یہ پانی اور آکسیجن جیسے عوامل سے بچاؤ بھی فراہم کرتا ہے جو اسکرین کی خرابی کا باعث بنتے ہیں۔ اس نئے سسٹم کو ایک سخت معیار کی جانچ سے گزارا گیا ہے جس میں 85 ڈگری سیلسیس درجہ حرارت اور 85 فیصد نمی کے تحت اسکرینز کو ٹیسٹ کیا گیا۔

ون پلس کی اس نئی حکمت عملی کا مقصد اپنے صارفین کے اعتماد کو مزید بڑھانا ہے۔ کمپنی نے اعلان کیا ہے کہ یہ لائف ٹائم وارنٹی خاص طور پر ہندوستانی مارکیٹ کے لیے متعارف کرائی گئی ہے جہاں انتہائی گرم اور مرطوب موسم میں اسکرین کی خرابی کے امکانات زیادہ ہوتے ہیں۔

ون پلس کے چیف ایگزیکٹو آفیسر رابن لیو نے اس پیش رفت کو ایک سنگ میل قرار دیتے ہوئے کہا کہ اس کی کمپنی نے ہمیشہ سے ہی تکنیکی ترقی کے ذریعے صارفین کے مسائل حل کرنے کی کوشش کی ہے۔ اس کا کہنا تھا، ’’ہم نے ہمیشہ نئی ٹیکنالوجیز کو اپنی مصنوعات میں شامل کیا ہے تاکہ ہم اپنے صارفین کی توقعات پر پورا اتر سکیں۔‘‘

یہ وارنٹی اس وقت شروع کی جا رہی ہے جب ون پلس نے اپنے ’پروجیکٹ اسٹار لائٹ‘ کے تحت ہندوستانی مارکیٹ میں 6000 کروڑ روپے کی سرمایہ کاری کا اعلان کیا تھا۔ اس اقدام کے ذریعے کمپنی اپنی مقبولیت میں مزید اضافہ کرنے کی کوشش کر رہی ہے۔