طوفان ’رگاسا‘ نے مچائی تباہی، تائیوان میں 14 اموات، ہانگ کانگ سے چین تک الرٹ، 700 سے زیادہ پروازیں منسوخ

فلیپنس میں تباہی مچانے کے بعد طوفان ’رگاسا‘ اب ہانگ کانگ، تائیوان اور جنوبی چین کی طرف بڑھ گیا ہے۔ یہ طوفان اتنا خطرناک ہے کہ یہ 205 کلومیٹر فی گھنٹے کی رفتار سے آگے بڑھ رہا ہے۔ تیز ہوائیں، موسلادھار بارش سے ہانگ کانگ شہر پوری طرح ٹھپ پڑ گیا ہے۔ ہانگ کانگ سے لے کر چین تک تباہی کا منظر ہے۔ طوفان ’رگاسا‘ کو لے کرہانگ کانگ انتظامیہ نے پہلے ہی الرٹ جاری کر دیا تھا اور 700 سے زیادہ پروازیں منسوخ کر دی گئی تھیں۔

تائیوان میں طوفان نے اب تک 14 لوگوں کو اپنی زد میں لیا ہے۔ طوفان سے آئے سیلاب میں 14 لوگوں کی موت ہوئی ہے۔ ساتھ ہی 124 افراد ابھی لاپتہ ہیں جبکہ فلیپنس میں 3 لوگوں کی جان گئی ہے۔

ہانگ کانگ میں آج لوگوں کی صبح تیز ہواؤں کے ساتھ ہوئی۔ تیز ہواؤں نے کئی پیڑوں کو گرا دیا۔ گھروں کو کافی نقصان پہنچا ہے۔ دو ندیوں اور سمندری ساحل کے آس پاس کے علاقوں میں پانی بھر گیا ہے۔ ہانگ کانگ میں طوفان کی وجہ سے اب تک 13 لوگ زخمی ہوئے ہیں، جنہیں اسپتال میں داخل کرایا گیا ہے۔

ہانگ کانگ میں سپر طوفان ’رگاسا‘ کے اثر سے حالات خراب ہو چکے ہیں۔ محکمہ موسمیات کے مطابق ’رگاسا‘ بدھ کی صبح 6 بجے سے 9 بجے کے درمیان شہر کے سب سے قریب ہوگا۔ رات بھر موسم کافی تیزی سے خراب ہوا ہے۔ آبزرویٹری نے وارننگ دی ہے کہ مسلسل شدید بارش، تیز ہوا، ساحلوں پر اونچی لہریں اور پانی کی سطح خطرناک طور سے بڑھ سکتی ہے۔ لوگوں کو گھروں کے اندر رہنے کی صلاح دی گئی ہے۔

طوفان کے خطرے کے پیش نظر احتیاتی اقدامات کیے جا رہے ہیں۔ چین کے گوانگڈونگ صوبہ میں، جسے ملک کی اقتصادی طاقت مانا جاتا ہے، اب تک 10 لاکھ سے زیادہ لوگوں کو محفوظ مقامات پر منتقل کر دیا گیا ہے۔ چین کی قومی موسم ایجنسی کے مطابق سپر طوفان بدھ کی دوپہر سے شام کے درمیان تائیشان اور جھان زیانگ شہروں کے درمیان ٹکرا سکتا ہے۔ احتیاطاً درجنوں شہروں میں اسکول، فیکٹریاں اور آمد و رفت خدمات بند کر دی گئی ہیں۔ جنوبی چین میں لوگ اور افسران ’رگاسا‘ کے پوری طاقت سے ٹکرانے کے بعد کی تیاریوں میں لگ گئے ہیں۔ یہ حالیہ برسوں میں اس علاقے میں ٹکرانے والا سب سے طاقتور طوفان بتایا جا رہا ہے۔

چین کے قومی موسم مرکز نے کہا ہے کہ طوفان کے ساتھ ہواؤں کی رفتار 200 کلومیٹر فی گھنٹہ تک ہو سکتی ہے۔ بارش 25 سے 45 سینٹی میٹر (9 سے 17 انچ) تک ہو سکتی ہے اور لہریں 7 میٹر (23 فٹ) تک اونچی اٹھ سکتی ہیں۔ اب تک صوبہ بھر میں 371000 سے زیادہ لوگوں کو محفوظ مقامات پر پہنچایا جا چکا ہے۔