اسرائیل اور بولیویا کا دو سال بعد سفارتی تعلقات بحال کرنے کا فیصلہ!

اسرائیل اور بولیویا نے سفارتی تعلقات بحال کرنے کا فیصلہ کیا ہے، جو دو سال قبل غزہ کی پٹی میں اسرائیل کی فوجی کارروائی شروع ہونے کے فوراً بعد بولیویا کی پہل پر ٹوٹ گئے تھے۔ اس بات کا اعلان اسرائیلی وزارت خارجہ نے کیا ہے۔

وزارت نے منگل کو ایک بیان میں کہا، "اسرائیلی وزیر خارجہ گیڈون سار اور بولیویا کے وزیر خارجہ فرنینڈو ارامیو آج واشنگٹن میں ملاقات کریں گے اور توقع ہے کہ ان تعلقات کو دوبارہ شروع کرنے کے لیے ایک معاہدے پر دستخط کریں گے۔"

وزارت نے کہا کہ بولیویا کے صدر روڈریگو پاز نے اس سال اکتوبر میں الیکشن جیتنے کے اگلے دن اسرائیلی وزیر خارجہ  سار کو فون کیا۔وزارت خارجہ نے کہا کہ "فون پر بات چیت کے دوران وزیر خارجہ نے اسرائیل کے ساتھ ایک نیا باب کھولنے اور سفارتی تعلقات کی مکمل تجدید کی خواہش کا اظہار کیا۔ نومنتخب صدر پاز نے بولیویا کو دنیا کے لیے دوبارہ کھولنے اور اسرائیل کے ساتھ تعلقات دوبارہ قائم کرنے کی خواہش کا اظہار کیا۔"قابل ذکر ہے کہ اس سے قبل دسمبر میں بولیویا نے اسرائیلی شہریوں کے لیے ویزا کی شرط ختم کرنے کا اعلان کیا تھا۔