ایران پر حملہ سے امریکہ کو خسارہ ہی خسارہ! 10 دنوں میں ہی صلح کا راستہ تلاش کرتے نظر آ رہے ٹرمپ

ایران پر حملہ کے 10 دنوں بعد امریکی صدر ڈونالڈ ٹرمپ کے مشیروں نے ان سے ’صلح کا راستہ‘ تلاش کرنے کا مشورہ دیا ہے۔ ان مشیروں کا کہنا ہے کہ ایران اور امریکہ کے درمیان جنگ اگر طویل ہو جاتی ہے تو اس کا براہ راست نقصان امریکہ کو ہوگا۔ غور کرنے والی بات یہ ہے کہ ٹرمپ اپنے بیانات میں اس جنگ کے طویل ہونے کا اشارہ دے چکے ہیں۔ ایک بیان میں تو انھوں نے واضح لفظوں میں کہا تھا کہ جنگ 3 سے 4 ہفتوں تک چل سکتی ہے۔ اب امریکہ کو اس جنگ میں صرف خسارہ ہی خسارہ دکھائی دے رہا ہے، اس لیے ’صلح کا راستہ‘ اختیار کرنے کا مشورہ دیا جا رہا ہے۔

مشیروں نے ٹرمپ کی توجہ اس جنگ کے مضر اثرات کی طرف مبذول کرائی ہے۔ ان کا کہنا ہے کہ جنگ زیادہ طویل ہونے سے حامی ووٹرس ناراض ہو سکتے ہیں۔ حالات کو پیش نظر رکھتے ہوئے ہی ٹرمپ نے 10 مارچ کو ایک بیان دیا ہے، جس میں جنگ جلد ختم کیے جانے کا عزم ظاہر کیا ہے۔ بیان میں ٹرمپ نے ضرور ایران کو ہارا ہوا بتایا ہے، لیکن اس حقیقت سے سبھی واقف ہیں کہ ایران نے امریکہ کو خوب نقصان پہنچایا ہے۔

وال اسٹریٹ جرنل کی ایک رپورٹ کے مطابق مشیروں نے ٹرمپ سے کہا ہے کہ ایران جنگ میں امریکہ کو کسی طرح کا معاشی یا فوجی فائدہ حاصل ہوتا دکھائی نہیں دے رہا ہے۔ جنگ طوالت اختیار کرتی ہے تو ریپبلکن ووٹرس ہی ناراض ہو سکتے ہیں، جو وسط مدتی انتخاب (جو رواں سال کے آخر میں مجوزہ ہے) کے لیے خطرناک ثابت ہو سکتا ہے۔

قابل ذکر ہے کہ جنگ کی ابتدا میں امریکہ کا مقصد ایران میں تختہ پلٹ کرنا تھا۔ اس کے لیے امریکہ نے جنگ کے دوسرے ہی دن ایران کے سپریم لیڈر آیت اللہ علی خامنہ ای کا قتل کر دیا۔ ایران کے ٹاپ-40 کمانڈرس مار دیے گئے۔ ایرانی صدر اور وزیر خارجہ کو بھی مارنے کی کوششیں ہوئیں۔ اس کے باوجود ایران جنگ میں امریکہ سے لڑتا رہا۔ ایسو سی ایٹیڈ پریس کے مطابق امریکی قومی خفیہ کونسل نے تجزیہ کی بنیاد پر ایک رپورٹ امریکہ کو سونپی ہے، جس میں کہا گیا ہے کہ جس طریقے سے حملے کیے جا رہے ہیں، اس سے تختہ پلٹ نہیں ہو سکتا ہے۔ رپورٹ میں یہ بھی کہا گیا ہے کہ اعلیٰ قیادت کی ہلاکت کے بعد بھی ایران کی عوام سڑکوں پر نہیں اتری، اس لیے تختہ پلٹ ممکن دکھائی نہیں دے رہا۔

اس درمیان ’کوئنی پیاک یونیورسٹی‘ کے ایک تازہ سروے میں 53 فیصد امریکی شہریوں نے ایران کے خلاف فوجی حملہ کی مخالفت کی ہے۔ سروے میں شامل 44 فیصد شہریوں کا ماننا ہے کہ اسرائیل کی حمایت امریکہ ضرورت سے زیادہ کر رہا ہے۔ حال ہی میں امریکی وزیر خارجہ مارکو روبیو نے ایک سوال کے جواب میں کہا بھی تھا کہ امریکہ نے اسرائیل کی وجہ سے ایران پر حملہ کیا۔

توجہ طلب یہ ہے کہ ایران پر لگاتار ہو رہے حملوں کی وجہ سے امریکہ کا خرچ بھی لگاتار بڑھتا جا رہا ہے۔ ’واشنگٹن پوسٹ‘ کی ایک رپورٹ کے مطابق ایران پر حملہ کے لیے امریکہ نے ابتدائی 2 دنوں میں 5.6 بلین ڈالر کا گولہ بارود استعمال کیا تھا۔ اب ’انادولو‘ ایجنسی نے جانکاری دی ہے کہ جنگ کے 10 دنوں میں امریکہ 10 بلین ڈالر سے زیادہ کا پیسہ پھونک چکا ہے۔ انہی باتوں کو پیش نظر رکھتے ہوئے مشیروں نے ٹرمپ سے کہا ہے کہ جنگ جتنی جلد ختم ہو، اتنا بہتر ہے۔

دلچسپ بات یہ ہے کہ ایران کے سرکردہ لیڈران نے کچھ ایسے بیانات دیے ہیں، جو امریکہ اور اسرائیل سے بدلہ لینے کا عزم ظاہر کرتے ہیں۔ یعنی ایرانی قیادت فی الحال جنگ بندی کے بارے میں سوچ بھی نہیں رہی۔ ایران کے وزیر خارجہ عباس عراقچی نے جو تازہ بیان دیا ہے، اس میں کہا ہے کہ امریکہ کو یہ غلط فہمی تھی کہ جنگ شروع ہوتے ہی ایران میں تختہ پلٹ ہو جائے گا، لیکن وہ اپنے منصوبہ کو کامیاب نہیں کر پائے۔ وہ ناکام ہو گئے۔ اب ’پلان بی‘ (جنگ جلد ختم کرنا) کے ذریعہ امریکہ جنگ کو جیتنا چاہتا ہے، لیکن اس میں بھی اسے کامیابی نہیں ملنے والی ہے۔ اس درمیان آئی آر جی سی کا بھی ایک بیان سامنے آیا ہے۔ اس کا کہنا ہے کہ ایرانی فوج اب تک خلیج فارس خطہ میں امریکہ کے 10 بے حد جدید رڈار سسٹم تباہ کرنے میں کامیاب رہی ہے۔ ساتھ ہی آئی آر جی سی نے اس بات پر زور دیا کہ موجودہ جنگ کا خاتمہ کب ہوگا، یہ واشنگٹن نہیں بلکہ تہران طے کرے گا۔