کیا راہل گاندھی کو اڈانی معاملہ پر بولنے کی سزا ملی؟ سرد پڑے کیسے میں بلیٹ کی رفتار سے فیصلہ اتفاق یا کچھ اور؟

وائناڈ سے رکن پارلیمنٹ راہل گاندھی کی لوک سبھا رکنیت منسوخ کیے جانے کے حکم کو کانگریس نے انھیں خاموش کرانے کی سازش قرار دیا ہے۔ راہل گاندھی کی لوک سبھا رکنیت جس کیس میں دو سال کی سزا ملنے کے سبب رد کی گئی ہے، اس پر کانگریس کے لیڈر اور سینئر وکیل ابھشیک منو سنگھوی نے کہا کہ ہمیں یقین ہے کہ سزا پر اسٹے لے لیں گے جو اس نااہلی کے بنیاد کو ہی ختم کر دے گا۔ ہمیں قانون پر پورا بھروسہ ہے۔

اس درمیان جس کیس میں راہل گاندھی کو قصوروار ٹھہرا کر دو سال کی سزا ملی ہے، اس میں اچانک ’بلیٹ‘ کی رفتار سے ہوئی سماعت کو لے کر سوال اٹھ رہے ہیں۔ کانگریس کے سینئر لیڈر جئے رام رمیش نے اسے اڈانی معاملے سے جوڑتے ہوئے کہا ہے کہ یہ محض اتفاق نہیں ہے۔ انھوں نے ایک ٹوئٹ میں کہا کہ ’’اڈانی کو لے کر 7 فروری کو لوک سبھا مین راہل گاندھی کی تقریر کے 9 دن بعد، 16 فروری کو ان کے خلاف ہتک عزت کا معاملہ شکایت دہندہ کے ذریعہ ہائی کورٹ میں اپنا اسٹے واپس لینے کے سبب تیز ہو جاتا ہے۔ 27 فروری کو بحث ایک سال بعد پھر سے شروع ہوئی اور 17 مارچ کو فیصلہ محفوظ ہو جاتا ہے۔ کیا یہ محض اتفاق ہے؟‘‘

اس سے پہلے پریس کانفرنس کو خطاب کرتے ہوئے کانگریس لیڈر اور سینئر وکیل ابھشیک منو سنگھوی نے کہا کہ راہل گاندھی کو سزا اور پھر ان کی لوک سبھا رکنیت ختم کرنا ایک سازش ہے۔ کیسے عرضی دہندہ نے کیس کو پہلے ڈیلے کیا اور پھر اپنے حساب سے اسے آگے بڑھاتے ہوئے سزا کا فیصلہ کروا لیا۔ انھوں نے کہا کہ ہمیں یقین ہے کہ سزا پر اسٹے لے لیں گے جو اس نااہلی کی بنیاد کو ہی ختم کر دے گا۔ ہمیں قانون پر پر پورا بھروسہ ہے۔

پریس کانفرنس سے جئے رام رمیش نے بھی خطاب کیا اور کہا کہ 2014 سے راہل گاندھی مودی حکومت کی پالیسیوں کے خلاف پارلیمنٹ کے اندر اور باہر آواز اٹھا رہے ہیں۔ نوٹ بندی، جی ایس ٹی، چینی قبضہ اور اب اڈانی کا ایشو، سبھی کے خلاف راہل گاندھی نے آواز اٹھائی ہے۔ اور آج اس کی انھیں قیمت ادا کرنی پڑ رہی ہے۔ یہ حکومت اس طرح کے فیصلے سے آواز اٹھانے والوں کو ڈرانا اور دبانا چاہتی ہے، لیکن ایسا نہیں ہوگا۔ راہل گاندھی اور پوری کانگریس جمہوریت کو بچانے کے لیے لڑائی جاری رکھے گی۔