’آج اپنے مستقبل کا فیصلہ کرنے کا دن ہے‘، پرینکا گاندھی واڈرا کی بہار کے ووٹروں سے اپیل

بہار اسمبلی انتخاب کے پہلے مرحلے کے لیے ووٹنگ صبح 7 بجے سے شروع ہو چکی ہے۔ کانگریس کی جنرل سیکریٹری اور رکن پارلیمنٹ پرینکا گاندھی واڈرا نے ووٹروں سے اپیل کی ہے کہ وہ بڑی تعداد میں پولنگ میں حصہ لیں اور اپنے مستقبل کے لیے ووٹ کریں۔

پرینکا گاندھی واڈرا نے ایکس پر لکھا، ’’بہار کے میرے پیارے بھائیو، بہنو، ماؤں اور نوجوانو! آج اپنے ہاتھوں سے اپنا مستقبل طے کرنے کا دن ہے۔ بڑی تعداد میں نکل کر جمہوریت کے اس جشن میں حصہ لیجیے۔ روزگار، تعلیم، صحت اور بہار کے روشن مستقبل کے لیے، اپنی جمہوریت، دستور اور ووٹ کے حق کی حفاظت کے لیے ووٹ کیجیے۔‘‘

انہوں نے کہا کہ ووٹ نہ صرف حق ہے بلکہ ذمہ داری بھی ہے اور ہر ووٹر کا فرض ہے کہ وہ اپنی ریاست کے بہتر کل کے لیے اپنا کردار ادا کرے۔

سماجوادی پارٹی کے صدر اکھلیش یادو نے بھی بہار کے ووٹروں سے اپیل کی کہ وہ بڑی تعداد میں ووٹ ڈالنے جائیں۔ انہوں نے اپنے پیغام میں کہا، ’’بہار کے ہر ایک ووٹر سے اپیل ہے کہ وہ اپنے سنہرے مستقبل کی تعمیر کے لیے ووٹ ڈالنے ضرور جائیں۔ جمہوریت میں ووٹ کی طاقت سب سے بڑی طاقت ہے، اس لیے اپنی طاقت کو پہچانیے اور استعمال کیجیے۔‘‘

اس سے قبل، کانگریس کے رہنما اور لوک سبھا میں قائدِ حزبِ اختلاف راہل گاندھی نے بدھ کی رات بہار کے عوام کے نام ویڈیو پیغام جاری کیا۔ انہوں نے کہا کہ یہ صرف ووٹنگ کا دن نہیں بلکہ بہار کے مستقبل کی سمت طے کرنے کا دن ہے۔

راہل گاندھی نے اپنے پیغام میں کہا، ’’آپ میں سے کئی پہلی بار ووٹ ڈالنے جا رہے ہیں۔ یہ صرف آپ کا حق نہیں بلکہ جمہوریت کی سب سے بڑی ذمہ داری ہے۔ آپ نے دیکھا، ہریانہ میں کس طرح ووٹ چوری کا کھیل کھیلا گیا۔ مہاراشٹر، مدھیہ پردیش، چھتیس گڑھ، ہر جگہ عوام کی آواز دبانے کی کوشش کی گئی۔ اب ان کی نظر بہار پر ہے، آپ کے ووٹ اور آپ کے مستقبل پر۔‘‘

انہوں نے عوام سے اپیل کی کہ وہ بڑی تعداد میں اپنے پولنگ مراکز پر پہنچیں اور عظیم اتحاد کے امیدواروں کے حق میں ووٹ کریں۔

الیکشن کمیشن کے مطابق، پہلے مرحلے میں 18 اضلاع کی 121 نشستوں پر ووٹنگ جاری ہے۔ ان اضلاع میں کھگڑیا، منگیر، لکھی سرائے، شیخ پورہ، نالندہ، پٹنہ، بھوجپور، مدھےپورہ، سہرسا، دربھنگہ، مظفرپور، گوپال گنج، سیوان، سارن، ویشالی، سمستی پور، بیگوسرائے اور بکسر شامل ہیں۔

ان 121 نشستوں پر کل 1314 امیدوار میدان میں ہیں، جن میں 1192 مرد اور 122 خواتین شامل ہیں۔ ان حلقوں میں کل 3 کروڑ 75 لاکھ 13 ہزار 302 ووٹر درج ہیں، جن میں 1.98 کروڑ مرد، 1.76 کروڑ خواتین اور 758 تیسری جنس کے ووٹر شامل ہیں۔

الیکشن کمیشن کے مطابق عام حلقوں میں ووٹنگ شام 6 بجے تک جاری رہے گی، جبکہ نکسل متاثرہ 6 اسمبلی حلقوں میں پولنگ شام 5 بجے ختم ہو جائے گی۔