جھارکھنڈ کی انکیتا کے ساتھ حیوانیت کرنے والے کو جلد سزا ملنی چاہیے: راہل گاندھی

نئی دہلی: کانگریس کے سابق صدر راہل گاندھی نے کہا کہ جھارکھنڈ کی انکیتا کے ساتھ جو حیوانیت ہوئی وہ شرمناک ہے اور مجرم کو جلد از جلد سزا ملنی چاہئے۔ اس سے قبل کانگریس کی جنرل سکریٹری پرینکا گاندھی نے بھی ٹوئٹ کر کے انکیتا قتل معاملہ میں انصاف کی فراہمی کا مطالبہ کیا۔

راہل گاندھی نے ٹوئٹ کیا، ’’انکیتا کے ساتھ ہوئی حیوانیت کے بعد اس کی موت نے ہر ہندوستانی کا سر شرم سے جھکا دیا ہے۔ آج، ملک میں خواتین کے لئے محفوظ ماحول بنانے کی سخت ضرورت ہے۔ انکیتا اور اس کے کنبہ کو انصاف تبھی ملے گا جب اس درندگی کو انجام دینے والے کو جلد از جلد اور کڑی سزا ملے گی۔‘‘

وہیں، پرینکا گاندھی نے ٹوئٹ کیا ’’جھارکھنڈ میں 12ویں میں پڑھنے والی لڑکی کے بہیمانہ قتل کا واقعہ دل دہلا دینے والا ہے۔ مجرموں کو فوری سزا ملنی چاہئے۔ جرائم کی روک تھام اور انصاف کے لئے ضروری ہے کہ خواتین کے خلاف جرائم کے واقعات میں قانونی عمل کو سختی سے اور جلد مکمل کیا جائے۔‘‘

خیال رہے کہ جھارکھنڈ کے دمکا میں 23 اگست کو 12ویں جماعت کی طالبہ انکیتا کو اس کے پڑوس میں رہنے والے ایک سنکی نوجوان نے پٹرول چھڑک کر آگ لگا دی تھی۔ وہ کافی عرصے سے انکیتا پر شادی کے لیے دباؤ ڈال رہا تھا۔