دہلی میں’ ووٹ چور مہا دھرنا‘ کامیاب بنانے کے لیے تمام سطحوں پر موثر انتظامات کئے جائیں: مہیش کمار گوڑ

تلنگانہ کانگریس کے صدر اور ایم ایل سی مہیش کمار گوڑنے ڈی سی سی صدور، فرنٹل آرگنائزیشنس اور ان سے منسلک تنظیموں کے صدورنشین کے ساتھ زوم میٹنگ منعقد کی جس میں اہم ہدایات اور رہنمائی دی گئی۔

مہیش کمار گوڑ نے حال ہی میں مقرر نئے ڈی سی سی صدور کا خیرمقدم کرتے ہوئے انہیں مبارکباد پیش کی۔ انہوں نے مشورہ دیا کہ نئی ذمہ داریاں سنبھالتے ہی ضلع کے سینئر قائدین اور اہم رہنماؤں کو ساتھ لے کر مکمل ہم آہنگی کے ساتھ کام کریں۔

انہوں نے ریاست میں جاری ووٹ چور دستخطی مہم کو مزید تیز کرنے کی ضرورت پر زور دیا اور ہدایت دی کہ 14 تاریخ کو دہلی میں ہونے والے ووٹ چور مہا دھرنا کو کامیاب بنانے کے لیے تمام سطحوں پر مناسب انتظامات کیے جائیں۔ اس کے ساتھ ہی، مقامی بلدی اداروں کے الیکشن کو مدنظر رکھتے ہوئے پارٹی کی مضبوطی اور جیت کے امکانات رکھنے والے امیدواروں کی تیاری پر بھی زور دیا۔

انہوں نے کہا کہ نئے ڈی سی سی صدور اے آئی سی سی انچارج میناکشی نٹراجن کی جانب سے مقرر کردہ 6ماہ کی کارکردگی کی ڈیڈ لائن کو ہرگز نظرانداز نہ کریں اور مقررہ مدت میں واضح پیشرفت دکھانا ضروری ہے۔مہیش کمار گوڑ نے واضح کیا کہ اگر ضلعی سطح پر پارٹی کو مضبوط کرتے ہوئے مکمل ہم آہنگی سے کام کیا جائے تو آنے والے انتخابات میں کانگریس کی کامیابی یقینی ہے۔