سپریم کورٹ میں وقف قانون کی آئینی حیثیت پر آج اہم سماعت، عبوری حکم کا امکان

نئی دہلی: سپریم کورٹ میں آج وقف (ترمیمی) ایکٹ 2025 کی آئینی حیثیت کو چیلنج کرنے والی درخواستوں پر اہم سماعت ہونے جا رہی ہے۔ چیف جسٹس بی آر گوئی اور جسٹس آگسٹین جارج مسیح کی بنچ تین اہم نکات پر دلائل سنے گی اور امکان ہے کہ عدالت ان نکات پر عبوری ہدایات جاری کرے گی۔

خیال رہے کہ عدالت نے 15 مئی کو سماعت ملتوی کرتے ہوئے کہا تھا کہ وہ 20 مئی کو ان تین نکات پر فریقین کے دلائل سن کر فیصلہ کرے گی۔

پہلا نکتہ وقف جائیدادوں کو ’ڈی نوٹیفائی‘ کرنے کے اختیار سے متعلق ہے، خاص طور پر وہ جائیدادیں جو عدالت، وقف بائی یوزر یا وقف ڈیڈ کے ذریعے وقف قرار دی گئی ہوں۔ دوسرا نکتہ ریاستی وقف بورڈ اور مرکزی وقف کونسل کی تشکیل سے متعلق ہے، جہاں درخواست گزاروں کا کہنا ہے کہ ان اداروں میں مسلمانوں کے سوا کسی کو شامل نہ کیا جائے، سوائے اُن کے جو بحیثیت عہدہ دار نامزد ہوں۔

تیسرا نکتہ اس شق پر ہے جس میں کہا گیا ہے کہ اگر ضلع کلکٹر کسی جائیداد کو سرکاری زمین قرار دیتا ہے تو وہ وقف جائیداد نہیں مانی جائے گی۔

عدالت نے دونوں فریقوں کے وکلا، سینئر وکیل کپل سبل اور سالیسٹر جنرل تشار مہتا کو 19 مئی تک تحریری نوٹس داخل کرنے کی ہدایت دی تھی۔ مہتا نے عدالت کو یقین دلایا ہے کہ حکومت وقف بایوزر جیسی کسی جائیداد کو ڈینوٹیفائی نہیں کرے گی، اور نہ ہی نئی تقرریاں کی جائیں گی۔

تاہم، عدالت نے واضح کیا ہے کہ وہ 1995 کے پرانے وقف قانون پر حکمِ امتناع جاری کرنے پر غور نہیں کرے گی۔ اس سے پہلے جسٹس سنجیو کھنہ کی بنچ اس معاملے کو سن رہی تھی، مگر ان کی ریٹائرمنٹ کے بعد یہ معاملہ جسٹس گوئی کی سربراہی میں منتقل کر دیا گیا۔

یاد رہے کہ 5 اپریل 2025 کو صدر جمہوریہ دروپدی مرمو نے وقف (ترمیمی) ایکٹ 2025 کی منظوری دی تھی۔ لوک سبھا میں یہ بل 288 ارکان کی حمایت جبکہ 232 کی مخالفت کے ساتھ پاس ہوا، راجیہ سبھا میں 128 بل کے حق میں تھے، جبکہ 95 ارکان نے اس کے خلاف ووٹ دیا۔

مرکزی حکومت نے اس قانون کا دفاع کرتے ہوئے عدالت میں 1332 صفحات پر مشتمل ابتدائی حلف نامہ بھی داخل کیا ہے، جس میں مؤقف اختیار کیا گیا ہے کہ پارلیمنٹ سے منظور شدہ کسی بھی قانون پر مکمل پابندی نہیں لگائی جا سکتی۔