روسی صدر پوتن کے دورہ ہند سے قبل دہلی میں سیکورٹی سخت

روسی صدر ولادیمیر پوتن کے دورہ ہندوستان سے قبل دہلی میں سیکورٹی کو کافی سخت کر دیا گیا ہے۔ پوتن کو دنیا کے سب سے زیادہ تحفظ یافتہ رہنماؤں میں سے ایک سمجھا جاتا ہے، اس لیے ہندوستان اور روس دونوں کی ایجنسیاں مل کر کام کر رہی ہیں تاکہ ان کی حفاظت میں کوئی کوتاہی نہ ہو۔ پوتن کا تیس  گھنٹے کا دورہ ہندوستان انتہائی خاص سمجھا جاتا ہے۔

پوتن کی حفاظت کے لیے تعینات روس کی خصوصی حفاظتی ٹیم چند روز قبل دہلی پہنچی تھی۔ یہ ٹیم ہوٹل، ہوائی اڈے اور جلسہ گاہ کے ہر علاقے کا باریک بینی سے معائنہ کر رہی ہے۔ ہر کمرہ  جواستعمال کیا جائے گا،جو  راستہ اختیار کیا جائے گا، اور داخلی اور خارجی دروازے پہلے سے طے کر لیے گئے ہیں۔

پوتن جہاں بھی سفر کرتے ہیں، ایک موبائل کیمیکل لیب ان کے ساتھ ہوتی ہے، جو ان کے کھانے اور پانی کی جانچ کرتی ہے۔ یہی وجہ ہے کہ وہ مقامی کھانے یا پانی سے پرہیز کرتے ہیں۔ خوراک اور پانی روس سے درآمد کیا جاتا ہے اور متعدد جانچ پڑتال کے بعد ہی فراہم کیا جاتا ہے۔ مزید برآں، وہ اپنے پورٹیبل بیت الخلا اپنے ساتھ رکھتے ہیں تاکہ یہ یقینی بنایا جا سکے کہ ان کی ذاتی طبی معلومات مکمل طور پر محفوظ ہے۔

دہلی پولیس، مرکزی ایجنسیاں اور اسپیشل پروٹیکشن گروپ (ایس پی جی) ہائی الرٹ پر ہیں۔ کسی بھی ناگہانی صورتحال سے نمٹنے کے لیے وی آئی پی روٹس کو آزمایا جا رہا ہے۔ دارالحکومت کے مختلف علاقوں میں پولیس کی بھاری نفری تعینات کر دی گئی ہے۔

پوری دہلی کو ہائی سیکورٹی زون قرار دیا گیا ہے، جس سے ٹریفک متاثر ہوگا۔ پوتن کے قافلے کے راستے میں ٹریفک کا رخ موڑ دیا جائے گا۔ پولیس عوام کو کم سے کم خلل ڈالنے کی کوشش کرے گی لیکن سیکیورٹی اولین ترجیح ہوگی۔ خصوصی یونٹس بشمول ایس ڈبلو اے ٹی کی ٹیمیں، انسداد دہشت گردی اسکواڈز، اور ریپڈ ریسپانس ٹیمیں، دارالحکومت بھر میں ا سٹریٹجک مقامات پر تعینات کی جائیں گی۔ ڈرون، سی سی ٹی وی نگرانی اور تکنیکی انٹیلی جنس سسٹم بھی تعینات کیا جائے گا۔ (بشکریہ نیوز پورٹل  ’اے بی پی‘)