خوفناک وقت میں اجنبی کشمیریوں نے ہر لمحہ حفاظت کی، پہلگام حملہ کی متاثرہ کی حقیقت بیانی

پہلگام حملے کے بعد پورے ملک میں غم کا ماحول ہے۔ اس حملے میں 26 لوگوں نے اپنی جان گنوائی ہے۔ رفتہ رفتہ اب اس سے جڑے متاثرین کی درد بھری داستان بھی سامنے آنے لگی ہے۔ اس حملے میں جان گنوانے والے لوگوں میں کوچی کی رہنے والی آرتی مینن کے والد این رام چندرن (65) بھی شامل تھے۔ آرتی نے پہلگام سے واپس آنے کے بعد میڈیا سے بات کرتے ہوئے خوفناک منظر کے بارے میں بتایا۔

آرتی نے میڈیا سے سے حملے کے وقت کے حالات کا ذکر کرتے ہوئے کہا، ’’پہلے تو ہمیں لگا کہ یہ پٹاخے کی آواز ہے لیکن اگلی ہی گولی چلنے پر پتہ چل گیا کہ یہ دہشت گردانہ حملہ ہے۔‘‘

آرتی کے والد اور ان کے چھ سال کے جڑواں بیٹے بیسرن میں ایک باڑے سے گھِرے گھاس کے میدان سے گزر رہے تھے۔ تبھی دہشت گردوں نے ان پر حملہ کر دیا۔ ان کی والدہ شیلا کار میں ہی بیٹھی رہیں۔

انہوں نے بتایا، ’’ہم بھاگنے کے لیے باڑ کے نیچے رینگ گئے۔ لوگ سبھی سمت میں بکھر گئے۔ جب ہم آگے بڑھ رہے تھے تو ایک آدمی جنگل سے نکل کر آیا۔ اس نے سیدھے ہماری طرف دیکھا۔ اس اجنبی نے کچھ ایسے لفظ بولے جو وہ سمجھ نہیں پائے۔ ہم نے جواب دیا، ہمیں نہیں پتہ۔ اگلے ہی لمحہ اس نے گولی چلا دی۔ میرے والد ہمارے بغل میں گر پڑے۔ میں نے دو لوگوں کو دیکھا، لیکن انہوں نے کسی فوجی کی وردی نہیں پہنی ہوئی تھی۔‘‘

ایجنسی کے مطابق آرتی نے بتایا کہ وہ لوگ تقریباً ایک گھنٹے تک جنگل میں بھٹکتے رہے۔ انہوں نے کہا، ’’میرے بیٹے چلّانے لگے اور وہ آدمی بھاگ گیا۔ مجھے پتہ تھا کہ میرے والد چلے گئے ہیں۔ میں نے بچوں کو ساتھ لیا اور وہاں سے نکل گئی۔ جنگل میں، مجھے نہیں پتہ تھا کہ میں کہاں جا رہی ہوں۔ جب میرا فون سگنل غائب ہو گیا تو میں نے اپنے ڈرائیور کو کال کیا۔

آرتی نے بتایا کہ ایسے خوفناک وقت میں کشمیر کے اجنبی لوگوں سے بہت ہمدردی ملی اور اِنہوں نے اپنے کنبے جیسا سلوک کیا۔ آرتی نے یاد کرتے ہوئے آگے کہا، ’’میرا ڈرائیور مسافر اور ایک دیگر شخص سمیر میرے بھائی بن گئے۔ وہ ہر لمحہ میرے ساتھ کھڑے رہے، مجھے مورچری لے گئے، ہماری مدد کی۔ میں وہاں 3 بجے تک انتظار کرتی رہی۔ انہوں نے ایک بہن کی طرح میری دیکھ بھال کی۔‘‘

جب آرتی سری نگر سے واپس آنے لگیں تو مدد کرنے والے ان دونوں سے انہوں نے کہا کہ ’’اب کشمیر میں میرے دو بھائی ہیں، اللہ آپ دونوں کی حفاظت کرے۔‘‘