راجستھان میں ڈبل انجن کی حکومت کے بعد بھی کوئی کام نہیں ہو رہا:  پائلٹ

راجستھان کے سابق نائب وزیر اعلی سچن پائلٹ نے ریاست کی بھارتیہ جنتا پارٹی (بی جے پی) حکومت کو نشانہ بناتے ہوئے کہا ہے کہ راجستھان میں ڈبل انجن کی حکومت بننے کے بعد بھی اب تک کوئی کام نہیں ہوا ہے۔سچن پائلٹ نے ہفتہ کو سرکٹ ہاؤس میں ایک پریس کانفرنس سے خطاب کیا جس میں  انہوں نے کہا کہ جمعہ کے خطاب میں کانگریس قیادت کو کٹہرے میں کھڑا کرنے کی کوشش کی گئی لیکن اب راجستھان میں بھی ڈبل انجن والی حکومت بن گئی ہے۔ جب مرکز میں بی جے پی کی حکومت بنی تھی تو انہوں نے بہت سے وعدے کیے تھے لیکن کچھ نہیں ہوا اور اب یہاں بھی کوئی کام نہیں کیاگیا ہے۔

انہوں نے کہا کہ ہر اسکیم کو زمین پر لانے کی کوشش کی جانی چاہئے لیکن حکومت بنے ہوئے زیادہ وقت نہیں گزرا کہ اسکیموں کے نام بدل دیئے گئے۔ نوجوانوں کو نوکری سے نکال دیا گیا ہے۔ انہوں نے کہا، ’’کل ہی میں جے پور میں دھرنے پر گیا اور نوجوانوں سے ملا۔‘‘ پائلٹ نے خواتین پہلوانوں کا دھرنا ومظاہرہ کا ذکر کرتے ہوئے کہا کہ بی جے پی خواتین کی بات کرتی ہے لیکن خواتین پہلوانوں کو احتجاج کرنا پڑا۔

انہوں نے کہا کہ لوک سبھا انتخابات کے لیے کانگریس کی تیاریاں پوری طاقت کے ساتھ جاری ہیں اور کل بھی میٹنگ تھی اور اب کیونکہ  انڈیا اتحاد بنا ہے اس لئے ممکن ہے کہ کانگریس 2019 کے انتخابات جتنی سیٹوں پر الیکشن نہ لڑے، لیکن ہم سب مل کر الیکشن لڑیں گے ۔

سچن  نے کہا کہ نوجوانوں کو موقع دیا جانا چاہئے اور کانگریس نے نوجوانوں کو موقع دیا ہے۔ نئے لوگوں کو موقع دیا جائے۔ پائلٹ نے دعویٰ کیا کہ پارٹی راجستھان میں بہت مضبوطی سے کام کرے گی اور پچھلے دو لوک سبھا انتخابات میں کانگریس اپنا کھاتہ نہیں کھول سکی تھی لیکن اس بار انتخابی نتائج کانگریس کے حق میں ہوں گے۔

سچن پائلٹ نے کہا کہ رام مندر کو ایک ایشو بنایا جا رہا ہے جب کہ کوئی ویشنو دیوی کب جائے گا، تروپتی کب جانا ہے یہ اس کی اپنی مرضی ہے۔ کوئی کسی سے پوچھ کر نہیں جائے گا۔ انہوں نے کہا کہ کانگریس نے بوتھ پر کام کیا ہے اور قومی صدر ملکارجن کھڑگے اور پارٹی لیڈر راہل گاندھی نے کہا ہے کہ ہمیں مل کر الیکشن لڑنا چاہئے اور ہم سب مل کر الیکشن لڑیں گے۔