ریونت ریڈی، گورو گگوئی، جگنیش میوانی، ادت راج، راگنی نایک کا کانگریس کے نیشنل کنونشن سے خطاب

گجرات کے احمد آباد میں آل انڈیا کانگریس کمیٹی (اے آئی سی سی) کے تاریخی قومی کنونشن کا دوسرا دن پورے آب و تاب کے ساتھ جاری ہے۔ اس تاریخی اجلاس میں کانگریس کے قومی صدر ملکارجن کھڑگے، لوک سبھا میں اپوزیشن لیڈر راہل گاندھی اور کانگریس پارلیمانی کمیٹی کی چیئرپرسن سونیا گاندھی سمیت دیگر سرکردہ رہنماؤں نے شرکت کی۔ کانگریس کے اس دو روزہ کنونشن میں 2 قرارداد پر تبادلہ خیال ہوا ہے۔ پہلی قرارداد ہے ’انصاف کا راستہ: عزم، لگن و جدوجہد‘ اور دوسری قرارداد ہے ’گجرات میں کانگریس کی ضرورت کیوں ہے؟‘ 2 روزہ اجلاس کے دوسرے دن 9 اپریل کو کانگریس پارٹی کے کچھ سرکردہ رہنماؤں نے اس قرارداد سے متعلق اپنی آراء ظاہر کی، اور کچھ لیڈران ملک کے موجودہ حالات پر اپنا موقف ظاہر کیا۔ یہاں پیش ہیں تلنگانہ کے وزیر اعلیٰ ریونت ریڈی، رکن پارلیمنٹ گورو گگوئی، رکن اسمبلی جگنیش میوانی، دلت لیڈر ادت راج اور پارٹی ترجمان راگنی نایک کے خطاب کا مختصر حصہ۔

1. ریونت ریڈی:

نریندر مودی اپنی گارنٹی کی بات کرتے ہیں لیکن وہ کبھی پوری نہیں ہوتی ہے۔ نریندر مودی نے کہا تھا کہ ہم ہر سال 2 کروڑ نوکریاں دیں گے لیکن 11 سال بعد بھی اس وعدے کی کوئی خبر نہیں ہے۔ لیکن جب راہل گاندھی جی نے تلنگانہ میں عوام سے وعدہ کیا تو ہم نے اسے پورا کر کے دکھایا۔ ہم نے تلنگانہ میں اقتدار میں آتے ہی ریاست کے لاکھوں کسانوں کا قرض معاف کیا اور ذات پر مبنی مردم شماری بھی کروائی۔ جہاں ایک طرف کانگریس پارٹی اور راہل گاندھی جی کی قیادت میں ہم سب گاندھی جی کے نظریے کو آگے لے جانے کا کام کر رہے ہیں۔ وہیں، نریندر مودی اس ملک میں گوڈسے کے نظریے کو پھیلانے کی کوشش کر رہے ہیں، اس لیے ہم سب کو اس کے خلاف کھڑا ہونا ہے۔

2. گورو گگوئی:

راہل گاندھی جی جب گجرات دورے پر آئے تھے تو انہوں نے کہا تھا کہ جن لوگوں کا ایک پیر کانگریس اور دوسری کسی اور پارٹی میں ہے ان کی پہچان کریں انہیں کانگریس سے باہر کرنا ہوگا۔ اگر ہمیں آنے والے وقت میں اسمبلی انتخاب جیتنے ہیں تو ایسے کٹر کانگریسیوں کو آگے لانا ہوگا جو ہر دھمکی یا لالچ کے باوجود بھی کانگریس سے جڑے رہیں۔ مجھے پورا بھروسہ ہے کہ اگر ہم کٹر کانگریسیوں کو آگے بھائیں گے تو ہر اسمبلی انتخاب میں ہماری جیت ہوگی۔

3. جگنیش میوانی:

گجرات کے خوابوں اور اس کی خواہشات کو یہاں کی بی جے پی حکومت پورا نہیں کر سکی۔ اس لیے کانگریس کو گجرات کی ترقی کے لیے ایک بلیو پرنٹ دینا ہوگا اور وہ ہم دیں گے۔ گجرات آج کے حالات سے بہت بہتر کر سکتا ہے۔ ہم گجرات کے ساتھ ساتھ پورے ملک میں پھیلی عدم مساوات کے خلاف لڑنے کے لیے پُرعزم ہیں۔

4. اُدت راج:

دلتوں اور قبائلیوں کی جو بھی ترقی ہوئی ہے، وہ کانگریس نے کی ہے۔ ہر شعبے میں ریزرویشن دے کر انہیں آگے بڑھایا۔ راہل جی آج پسماندہ لوگوں، دلتوں اور قبائلیوں کو ہر میدان میں حصہ داری دلانے کے لیے لڑائی لڑ رہے ہیں۔ اگر ہم نے راہل جی کا ساتھ نہیں دیا تو دلت پھر سے غلام ہو جائے گا۔

5. راگنی نائک:

چمپارن میں مہاتما گاندھی نے پہلی بار بے خوفی کا منتر دیا اور کہا کہ ڈرو مت۔ وہی نعرہ کا کانگریس کا ہاتھ دکھا کر راہل جی کہتے ہیں، ناانصافی سے ڈرو مت، اقتدار کی تاناشاہی سے ڈرو مت۔ آج ملک میں مہنگائی کی مار ہے، نوجوان بے روزگار ہیں، خواتین کی عزتیں پامال ہو رہی ہیں، کسان خودکشی کرنے پر مجبور ہیں۔ پٹرول-ڈیزل 100 کے پار ہے، ناکارہ اور نکمی بی جے پی سرکار ہے۔