بہار کے عوام ہجرت کے درد میں مبتلا، حکومت نے روزگار چھینا اور ملک کی دولت دوستوں کو دے دی: پرینکا گاندھی

بہار اسمبلی انتخابات کی مہم کے دوران کانگریس کی جنرل سکریٹری پرینکا گاندھی نے ہفتہ کو بیگو سرائے کے بچھواڑا اسمبلی حلقے میں ایک پرجوش عوامی جلسے سے خطاب کیا۔ انہوں نے کانگریس امیدوار شیو پرکاش غریب داس کے حق میں ووٹ دینے کی اپیل کی اور ریاستی و مرکزی حکومت پر سخت تنقید کی۔

پرینکا گاندھی نے اپنی تقریر میں کہا کہ ’’بہار کے عوام آج ہجرت کے درد میں زندگی گزار رہے ہیں۔ یہاں کے کسان اپنے لہلہاتے کھیت چھوڑ کر دوسرے صوبوں میں مزدوری کرنے پر مجبور ہیں۔ مہنگائی عروج پر ہے، ٹیکسوں کا بوجھ بڑھتا جا رہا ہے، اور عام آدمی کی زندگی اجیرن ہو گئی ہے۔‘‘

انہوں نے کہا کہ ’’حکومت نے عوام کے حصے کی دولت چند سرمایہ دار دوستوں کو سونپ دی ہے۔ جو صنعتیں ملک کی تھیں، جن سے کروڑوں لوگوں کو روزگار ملتا تھا، وہ سب بیچ دی گئیں۔ ہر شعبہ ٹھیکے پر دے دیا گیا ہے اور نجکاری کے نام پر عوام کا حق چھین لیا گیا ہے۔‘‘

پرینکا گاندھی نے نتیش کمار اور نریندر مودی پر نشانہ لگاتے ہوئے کہا، ’’بیس برسوں سے حکومت چلانے کے بعد بھی اب کہہ رہے ہیں کہ ڈیڑھ کروڑ نوکریاں دیں گے۔ جب اتنے سال اقتدار میں تھے تو کیوں نہیں دی؟ ان کے وعدے کھوکھلے ہیں، چھوٹے کاروبار ختم ہو گئے، عوام کا جو کچھ تھا وہ اپنے دوستوں کو بیچ دیا گیا۔‘‘

انہوں نے کہا کہ ’’عوام کے دل میں خوف ہے۔ آج لوگ سوچتے ہیں کہ علاج کہاں کرائیں؟ بچوں کی پرورش کیسے کریں؟ بہار میں عورتوں کی حالت بد سے بدتر ہو چکی ہے۔ وہ گھر، کھیت اور خاندان سب کچھ سنبھالتی ہیں، مگر ان کی حالت میں کوئی بہتری نہیں آئی۔‘‘ پرینکا گاندھی نے کہا کہ ’’وزیر اعظم مودی ڈبل انجن حکومت کی بات کرتے ہیں مگر آپ کی کوئی سنوائی نہیں ہے، حتیٰ کہ آپ کے وزیر اعلیٰ کی بھی نہیں۔ ساری طاقت دہلی کے ہاتھوں میں ہے اور آپ کی زمینیں کوڑیوں کے دام بیچی جا رہی ہیں۔‘‘

انہوں نے عوام سے اپیل کی کہ وہ تبدیلی لائیں، یہاں کے تعلیم یافتہ نوجوان بے روزگار بیٹھے ہیں۔ ایسے لیڈروں سے ہوشیار رہیں جو صرف اپنا چہرہ چمکانے آتے ہیں، پھر ووٹ چوری کر کے چلے جاتے ہیں۔ کانگریس لیڈر نے کہا کہ ’’ملک میں آئی آئی ٹی، آئی آئی ایم اور بڑے ادارے کانگریس نے بنوائے۔ ہم ماضی میں نہیں جانا چاہتے، مگر یہ حقیقت ہے کہ ترقی کے بڑے قدم کانگریس کے دور میں اٹھائے گئے۔‘‘

انہوں نے راہل گاندھی کے ’ذات پر مبنی مردم شماری‘ اور ’سماجی انصاف‘ کے مطالبات کا حوالہ دیتے ہوئے کہا کہ ’’ہم سب کا ترقی میں برابر کا حصہ چاہتے ہیں، تاکہ کوئی طبقہ پیچھے نہ رہ جائے۔‘‘ خواتین سے مخاطب ہوتے ہوئے پرینکا گاندھی نے کہا، ’’میں بھی ایک عورت ہوں، اس لیے آپ کی جدوجہد کو سمجھتی ہوں۔ آپ اپنے حقوق پہچانیں، جو آپ کے لیے کچھ نہیں کرتا، اسے اقتدار سے باہر کریں۔ جب لیڈر جھوٹے وعدے لے کر آئیں، تو آپ کا شعور آپ کا سب سے بڑا ہتھیار بننا چاہیے۔‘‘

انہوں نے کہا کہ ’’یہ موقع ہے کہ آپ عزت اور خودداری کے ساتھ اپنا فیصلہ کریں۔ پیسے لیں، مگر ووٹ سوچ سمجھ کر دیں۔ تبدیلی صرف آپ کے فیصلے سے آئے گی۔‘‘ جلسے میں بڑی تعداد میں مرد و خواتین شریک ہوئے اور بارش کے باوجود ’پرینکا گاندھی زندہ باد‘ کے نعروں سے ماحول گونجتا رہا۔