’ بلڈوزر کے تیل-پانی کا انتظام کرے گا اپوزیشن‘، ملاوٹی چنے پر اکھلیش یادو نے یوگی حکومت کو بنایا نشانہ

سماج وادی پارٹی (ایس پی) کے صدر اکھلیش یادو نے گورکھپور میں بُھنے چنے میں خطرناک کیمیکل کی ملاوٹ کے معاملے میں وزیراعلیٰ یوگی آدتیہ ناتھ اور یوپی حکومت پر سخت حملہ کیا۔ انہوں نے اس معاملے میں ملی بھگت کا اشارہ کرتے ہوئے سوال کیا کہ کیا اب بلڈوزر کا انتظام اپوزیشن کرے گا؟

ایس پی صدر نے بُھنے ہوئے چنے میں ملاوٹ کے لئے حکمرانوں کی ملی بھگت کا شبہ ظاہر کیا اور کہا کہ اس میں ان کا کچھ حصہ تو رہا ہوگا۔ اکھلیش یادو نے اپنے سوشل میڈیا اکاؤنٹ پر پوسٹ میں لکھا، ’’مکھیہ نگری میں ملاوٹ والے... لگتا ہے آپسی ’ملاؤ-ملاپ‘ سے ہی ہو رہی ہے یہ ملاوٹ۔ بلڈوزر کے تیل-پانی کا انتظام اب کیا اپوزیشن کرے گا؟ کچھ تو ہے جس میں حصہ داری ہے؟‘‘

خبر کے مطابق گورکھپور میں فوڈ اینڈ ڈرگ ڈپارٹمنٹ کے حالیہ چھاپے میں اس وقت کھلبلی مچ گئی جب بھاری مقدار میں ملاوٹ شدہ بُھنے ہوئے چنے برآمد ہوئے۔ ان چنے کو پیلے رنگ میں چمکانے کے لیے جن خطرناک کیمیکل کا استعمال کیا گیا اسے کھانے سے انسان کی کڈنی اور لیور خراب ہوسکتے ہیں۔ جس کے بعد محکمہ نے فوری طور پر ان کی فروخت پر پابندی لگا دی۔

محکمہ کے مطابق یہ ملاوٹی بُھنے چنے مدھیہ پردیش اور چھتیس گڑھ سے لائے گئے تھے۔ محکمہ خوراک کو اطلاع ملی تھی کہ گورکھپور کے راج گھاٹ علاقے میں واقع ایک گودام میں ملاوٹی چنا آرہا ہے جس کو بازار میں سپلائی کیا جارہا ہے۔ یہ اطلاع ملتے ہی محکمہ خوراک نے چھاپے ماری کی تو کارروائی میں شامل ٹیمیں حیران رہ گئیں۔

ان چنے کا رنگ کافی تیز اور چمکدار دکھائی دے رہا تھا۔ جب ٹیم نے اس کی جانچ کی تو چنوں نے پیلا رنگ چھوڑنا شروع کردیا۔ جس کے بعد محکمہ خوراک نے گودام سے 750 بوریوں کو ضبط کرلیا۔ یہ چنے بازار میں بیچنے لائق نہیں تھے اور نہ ہی کھانے کے لائق تھے۔ ان کے کھانے سے کڈنی اور لیور تک فیصل ہوسکتے ہیں۔