اب شادی شدہ خواتین بھی بن سکیں گی ’حسینہ کائنات‘

حسینہ کائنات کا مقابلہ ایک ایسا اسٹیج ہے جہاں پوری دنیا سے خوبصورت خواتین اپنے ملک کی نمائندگی کرنے پہنچتی ہیں اور معیار پر کھری اترنے والی کو تاج نصیب ہوتا ہے۔ کئی بار حالات ایسے ہو جاتے ہیں کہ سخت محنت کے بعد بھی ناکامی حاصل ہوتی ہے، اور کئی بار بڑھتی عمر کی وجہ سے وہ اپنا نام اس میں نہیں دے پاتیں۔ اب ایسی خبریں سامنے آ رہی ہیں جسے سننے کے بعد ان خواتین کے چہرے کھل اٹھیں گے جو اس تاج کو اپنے سر پر سجتا ہوا دیکھنا چاہتی تھیں، لیکن شادی کے بندھن میں بندھ کر اس سے محروم رہ گئیں۔

میڈیا رپورٹس کے مطابق مس یونیورس بیوٹی کانٹیسٹ نے حال ہی میں ایک نیا اصول قائم کیا ہے جس کے مطابق اب شادی کے بعد بھی خواتین اس مقابلہ حسن کا حصہ بن سکتی ہیں۔ حسینہ کائنات کا تاج اپنے سر پر سجے دیکھنے کا خواب دیکھنے والی خواتین کو اب اپنی عمر کے بارے میں زیادہ سوچنے کی ضرورت نہیں ہوگی۔ یعنی اب نہ بڑھتی ہوئی عمر، نہ شادی اور نہ ہی بچے اس مقابلے میں شریک ہونے میں رخنہ انداز ہوں گے۔ ایک رپورٹ کے مطابق اس سال ہونے والے حسینہ کائنات پیجنٹ کانٹیسٹ میں گزشتہ 70 سال سے جاری اصول کو ختم کرنے کا اعلان کر دیا گیا ہے۔ نئے اصول کے مطابق اب شادی شدہ خواتین بھی اس مقابلے میں شرکت کر سکیں گے۔ یہ اصول سال 2023 سے نافذ العمل ہوگا۔

واضح رہے کہ ابھی تک حسینہ کائنات کے لیے ہونے والے مقابلہ حسن میں صرف 18 سے 28 سال کی عمر تک کی غیر شادی شدہ خواتین ہی حصہ لے سکتی تھیں۔ نئے اصول کی لوگ تعریف بھی کر رہے ہیں جن میں 2020 میں حسینہ کائنات بننے والی میکسیکو کی اینڈریا میجا بھی شامل ہیں۔ اینڈریا نے اس نئے اصول کی تعریف کرتے ہوئے کہا کہ ’’ذاتی طور پر مجھے خوشی ہو رہی ہے۔ ان عہدوں پر پہلے صرف مردوں کی ہی بالادستی تھی، لیکن اب تبدیلی کا وقت آ گیا ہے۔‘‘