مہاراشٹر: بھنڈارا آرڈیننس فیکٹری دھماکے میں اموات کی تعداد 8 ہو گئی، وزیر دفاع سمیت کئی رہنماؤں کا اظہار تعزیت

ممبئی: مہاراشٹر میں بھنڈارا کے جواہر نگر میں واقع آرڈیننس فیکٹری میں بدھ کے روز ایک زوردار دھماکہ ہوا۔ اس حادثے میں ہلاک ہونے والے افراد کی تعداد 8 ہو گئی ہے، جبکہ 7 افراد زخمی ہیں۔ وزیر دفاع راج ناتھ سنگھ اور وزیر نیشنل ہائی ویز نتن گڈکری سمیت دیگر سیاستدانوں نے اس افسوسناک واقعے پر گہرے دکھ کا اظہار کیا ہے۔

نتن گڈکری نے ایک پریس کانفرنس میں بتایا کہ دھماکے کے وقت فیکٹری میں موجود 8 افراد جاں بحق ہو گئے، جبکہ زخمیوں کو فوری طور پر اسپتال منتقل کیا جا رہا ہے۔ انہوں نے حادثے میں مرنے والوں کو تعزیت پیش کی اور زخمیوں کی صحت یابی کے لیے دعا کی۔

راج ناتھ سنگھ نے ایکس پوسٹ میں کہا کہ اس دھماکے سے وہ گہرے دکھ میں ہیں۔ انہوں نے متاثرہ خاندانوں کے ساتھ یکجہتی کا اظہار کیا۔ انہوں نے یہ بھی کہا کہ امدادی ٹیمیں موقع پر پہنچ کر بچاؤ کے کام میں مصروف ہیں اور حکومت کی جانب سے تمام ممکنہ اقدامات کیے جا رہے ہیں۔

مہاراشٹر کے وزیر اعلیٰ دیوینڈر فڑنویس نے واقعہ پر افسوس کا اظہار کرتے ہوئے کہا کہ دھماکے کے بعد چھت گرنے کی وجہ سے کئی افراد فیکٹری کے اندر پھنس گئے تھے، جن میں سے پانچ افراد کو بچا لیا گیا ہے۔ انہوں نے یہ بھی کہا کہ ضلع انتظامیہ اور پولیس کی ٹیمیں بچاؤ کے کام میں سرگرم ہیں، جبکہ ایس ڈی آر ایف اور ناگپور نگر میونسپل کارپوریشن کی ٹیموں کو بھی طلب کیا گیا ہے۔

موقع پر موجود افسران نے بتایا کہ دھماکہ اتنا شدید تھا کہ اس کی آواز پانچ کلومیٹر دور تک سنائی دی۔ فیکٹری کے قریب سے اٹھتے ہوئے دھوئیں نے علاقے کو گھیر لیا تھا، جس کی ویڈیوز میڈیا پر وائرل ہو گئی تھیں۔ امدادی ٹیموں نے زخمی افراد کو اسپتال منتقل کرنے کے ساتھ ساتھ دھماکے کے مزید اسباب جاننے کی کوششیں شروع کر دی ہیں۔