کنال کامرا نے بامبے ہائی کورٹ کا دروازہ کھٹکھٹایا، ایف آئی آر منسوخ کرنے کے لیے عرضی

معروف اسٹینڈ اَپ کامیڈین کنال کامرا نے خود پر درج ایف آئی آر کے خلاف بامبے ہائی کورٹ کا دروازہ کھٹکھٹایا ہے۔ انہوں نے ایف آئی آر کے قانونی ہونے، شفافیت اور منشا پر سوال اٹھاتے ہوئے بامبے ہائی کورٹ میں عرضی داخل کرکے اسے منسوخ کرنے کا مطالبہ کیا ہے۔

دراصل 2 اپریل کو ممبئی کی کھار پولیس نے کنال کامرا کو تیسرا سمن جاری کرتے ہوئے انہیں 5 اپریل کو پوچھ تاچھ کے لیے تھانے میں حاضر ہونے کے لیے کہا تھا۔ کنال ان تینوں سمن پر تھانے میں حاضری نہیں دے سکے۔

کنال کامرا کے وکیل ہائی کورٹ کے جسٹس سارنگ کوٹوال اور ایس ایم مودک کی بنچ کے سامنے عرضی پر بات کریں گے۔ بامبے ہائی کورٹ میں عرضی داخل کرنے سے پہلے کامرا نے ممبئی پولیس کو خط لکھ کر ویڈیو کانفرنسنگ کے توسط سے اپنا بیان درج کرانے کی بات کہی تھی لیکن لیکن کھار پولیس نے ابھی تک کامرا کی اس اپیل کا کوئی جواب نہیں دیا ہے۔

واضح رہے کہ گزشتہ دنوں کنال کامرا کا ایک ویڈیو وائرل ہوا تھا جس میں انہوں نے مبینہ طور پر بغیر نام لیے مہاراشٹر کے نائب وزیراعلیٰ (ایکناتھ شندے) پر ’غدار‘ ہونے کا تبصرہ کیا تھا، اس کے بعد کامرا کے خلاف ممبئی کے کھار پولیس اسٹیشن میں معاملہ درج کر لیا گیا تھا۔

4 اپریل کو کھار پولیس کی ایک ٹیم کنال کامرا کے خلاف ایف آئی آر درج کرکے جانچ کرنے کے لیے پڈوچیری پہنچی۔ کنال کامرا تمل ناڈو کے رہنے والے ہیں۔ اس درمیان مدراس ہائی کورٹ سے معاملے میں 7 اپریل تک کے لیے کامرا کو عبوری ضمانت مل گئی تھی۔ یہ ضمانت انہیں اس ریاست میں دی گئی ہے جہاں ایف آئی آر درج نہیں ہوئی ہے، جو گرفتاری سے عارضی حفاظت دیتی ہے۔