کشمیر: گاندربل حملے میں مارا جانے والا ملی ٹینٹ ریاض نائیکو کا قریبی ساتھی، دلباغ سنگھ

سری نگر: جموں و کشمیر پولیس کے سربراہ دلباغ سنگھ نے کہا ہے کہ گاندربل حملے میں مارا جانے والا ملی ٹنٹ حزب المجاہدین کے مہلوک چیف آپریشنل کمانڈر ریاض نائیکو کا قریبی ساتھی رہا ہے۔ انہوں نے کہا کہ مہلوک ملی ٹنٹ کو خصوصی طور پر گاندربل حملہ کرنے کے لئے بھیجا گیا تھا۔

خیال رہے کہ منگل کی شام وسطی ضلع گاندربل میں ملی ٹنٹوں نے بی جے پی لیڈر غلام قادر راتھر پر حملہ کیا جس کے نتیجے میں شبیر احمد ساکن اونتی پورہ نامی ایک ملی ٹنٹ ہلاک اور موصوف لیڈر کا ایک ذاتی محافظ الطاف حسین شہید ہوگئے۔ دلباغ سنگھ نے بدھ کی صبح یہاں ضلع پولیس لائنز میں منگل کی شام ملی ٹنٹوں کے حملے میں مارے جانے والے پولیس اہلکار الطاف حسین کو خراج عقیدت پیش کرنے کے لئے منعقدہ تقریب کے حاشیے پر میڈیا کو اس حملے کے بارے مختصر تفصیلات فراہم کیں۔

انہوں نے کہا کہ 'کل شام بی جے پی لیڈر غلام قادر راتھر، جو گاندربل کے رہنے والے ہیں، گھر سے نکل رہے تھے کہ ان پر جب حملہ کیا گیا۔ ان کے ساتھ ہمارے دو لوگ الطاف حسین اور کانسٹیبل جہانگیر تھے۔ تو الطاف حسین نے جوابی فائر کی اور خود زخمی ہوگئے اور اس دوران شبیر احمد ساکن اونتی پورہ نامی ایک ملی ٹنٹ، جو ریاض نائیکو کا قریبی ساتھی رہا ہے، ہلاک ہوا'۔ موصوف پولیس سربراہ نے بتایا کہ الطاف حسین کو زخمی حالت میں اسپتال پہنچایا گیا لیکن وہ زخمی کی تاب نہ لا کر فوت ہوگئے۔ انہوں نے کہا کہ ہمیں اپنے ساتھی پر فخر ہے کہ جس نے حملے کا منہ توڑ جواب دیا۔

جائے وارات پر ایس ایس پی گاندربل خلیل پوسوال نے واقعے کی تفصیلات فراہم کرتے ہوئے نامہ نگاروں کو بتایا تھا کہ 'شام کو بی جے پی لیڈر غلام قادر جس کو سیکورٹی فراہم کی گئی ہے، پر اس وقت حملہ ہوا جب وہ گھر سے اپنی سرکاری رہائش گاہ کی طرف جا رہے تھے، موصوف لیڈر کے ساتھ پولیس کی ایک پارٹی موجود تھی جس نے جوابی کارروائی کی اس دوران ایک ملی ٹنٹ ہلاک ہوا۔ مہلوک ملی ٹنٹ سے اسلحہ بھی برآمد کیا گیا'۔ انہوں نے کہا کہ حملے کے دوران زخمی ہونے والے پولیس اہلکار کو اسپتال منتقل کیا گیا لیکن وہ جانبر نہ ہوسکے۔

موصوف نے کہا کہ اندھیرے کی وجہ سے حملہ کرنے والے ملی ٹنٹوں کی تعداد معلوم نہیں ہوسکی ہے تاہم جائے واردات سے جو کارٹریجز موصول ہوئے ہیں ان سے معلوم ہوتا ہے کہ حملہ آور ایک سے زیادہ تھے۔ انہوں نے کہا کہ مہلوک ملی ٹنٹ کا تعلق بمطابق رپورٹس ٹی آر ایف سے ہے۔ دریں اثنا ضلع پولیس لائنز سری نگر میں بدھ کی صبح مہلوک پولیس اہلکار الطاف حسین کی میت پر پھول مالائیں چڑھانے کی تقریب منعقد کی گئی۔

پولیس کی طرف سے جاری ایک بیان میں کہا گیا کہ اس تقریب میں جموں و کشمیر پولیس سربراہ دلباغ سنگھ کےعلاوہ ایڈیشنل ڈی جی پی کارڈینشنز جاوید مجتبیٰ گیلانی، ایڈیشنل ڈی جی پی ہیڈ کوارٹرس اے جی میر، ایڈیشنل ڈی جی پی سی آئی ڈی آر آر سوین، ایڈیشنل ڈی جی پی آرمڈ اے کے چودھری، آئی جی پی کشمیر وجے کمار، آئی جی سی آر پی ایف آپریشنز دیپک رتن، ڈی آئی جی سی آر پی ایف آپریشنز اشوک شامیال، ایس ایس پی سری نگر ڈاکٹر ایم حسیب مغل، ضلع مجسٹریٹ گاندربل شفقت اقبال، ایس ایس پی گاندربل خلیل پوسوال وغیرہ نے شرکت کی۔