ہنی مون قتل کیس: سونم اور راج کشواہا سمیت 5 ملزمان کے خلاف 790 صفحات پر مشتمل چارج شیٹ دائر

میگھالیہ: اندور کے ہنی مون قتل کیس میں میگھالیہ پولیس کی خصوصی تحقیقاتی ٹیم (ایس آئی ٹی) نے جمعہ کی شام عدالت میں 790 صفحات پر مشتمل چارج شیٹ جمع کرائی۔ یہ کیس شہر کے معروف بزنس مین، راجا رگھووشی کی قتل سے متعلق ہے، جس نے پورے ملک میں ہلچل مچائی تھی۔

پولیس کے مطابق چارج شیٹ میں قتل کی منصوبہ بندی کے ماسٹر مائنڈ راجا کی اہلیہ سونم رگھووشی اور اس کے عاشق راج کُشواہا کو قرار دیا گیا ہے۔ اس سازش میں تین دیگر ملزمان، آکاش راجپوت، آنند کرمی اور وشال سنگھ چوہان نے بھی اہم کردار ادا کیا۔ پانچوں پر فوجداری قانون کی دفعات قتل، شواہد مٹانے اور فوجداری سازش کے تحت کیس درج کیا گیا ہے۔ موجودہ وقت میں یہ تمام ملزمان عدالتی حراست میں جیل میں ہیں۔

چارج شیٹ کے مطابق، قتل کی منصوبہ بندی نہایت محتاط طریقے سے کی گئی تھی۔ تفتیش کے دوران پولیس نے متعدد شواہد جمع کیے، جن میں کال ریکارڈز، لوکیشن ڈیٹا اور گواہوں کے بیانات شامل ہیں۔ مزید برآں، پولیس نے بتایا کہ اس کیس میں تین اور شریک ملزمان، پراپرٹی ڈیلر سلومے جیمز، بلڈنگ مالک لوکندر تومر اور سکیورٹی گارڈ بالویر اہیروار کے خلاف جلد سپلیمنٹری چارج شیٹ جمع کرائی جائے گی۔ ان پر شواہد کو نقصان پہنچانے اور چھپانے کا الزام ہے۔؎

یہ قتل کیس اس وقت خبروں کی زینت بنا جب راجا رگھووشی کی شادی کے چند دن بعد ہی انہیں قتل کر دیا گیا۔ اس واقعہ نے نہ صرف اندور بلکہ پورے ملک میں لوگوں کو ہلا کر رکھ گیا۔ پولیس نے دعویٰ کیا ہے کہ چارج شیٹ میں شامل مضبوط شواہد کے باعث تمام ملزمان کے خلاف کیس مضبوط ہے۔ عدالت میں اس معاملے کی سماعت جلد شروع ہونے کی توقع ہے۔