مدھیہ پردیش کے کسان پریشان، کھاد ڈسٹریبیوشن سنٹرس پر لگی لمبی قطاریں

مدھیہ پردیش میں مانسون کی بارش کے بعد خریف سیزن کے لیے کھیتوں میں بوونی کا کام شروع ہو گیا ہے، لیکن کسانوں کو کھاد کی کمی سے نبرد آزما ہونا پڑ رہا ہے۔ شیوپوری ضلع میں تو کسانوں کو ڈی اے پی نہیں مل رہا ہے جس کی وجہ سے لمبی لمبی قطاریں لگی ہوئی ہیں۔ شیوپوری کے لودھابلی واقع کھاد ڈسٹریبیوشن سنٹرس پر منگل کو کھاد کے لیے پریشان کسانوں کی لمبی لائن لگی دیکھی گئی۔ کسانوں کا الزام ہے کہ ڈسٹریبیوشن سنٹر پر بدانتظامی کا ماحول ہے، ڈی اے پی صحیح ڈھنگ سے تقسیم نہیں کیا جا رہا ہے۔

جرٹھی گاؤں کے کسان ہرش وردھن مجیجی نے بتایا کہ کھاد سنٹرس پر بدانتظامی کا ماحول ہے اور خریف سیزن میں انھیں ڈی اے پی کی ضرورت ہے۔ لیکن ڈسٹریبیوشن نظام صحیح نہیں ہونے سے مراکز پر لمبی لمبی لائنیں لگی ہوئی ہیں۔ کسان سنیل دھاکڑ اور بائسرام نے الزام لگایا کہ پرائیویٹ دکانداروں کو خاموشی کے ساتھ چھپا کر ڈی اے پی دیا جا رہا ہے۔ اس کے بعد پرائیویٹ دکاندار اونچی قیمتوں پر ڈی اے پی فروخت کر رہے ہیں۔