میری خاموشی کو کمزوری نہ سمجھیں: ادھو ٹھاکرے

ممبئی: کورونا بحران کے درمیان مہاراشٹر کے وزیر اعلیٰ ادھو ٹھاکرے نے عوام سے خطاب کیا۔ ویڈیو کانفرنسنگ کے ذریعہ خطاب کے دوران انہوں نے کہا کہ عوام نے لاک ڈاؤن کے ضوابط پر عمل کیا ہے۔ تاہم، کورونا بحران ابھی ختم نہیں ہوا ہے۔ حکومت کی جانب سے معمولات زندگی کو پٹری پر لانے کے لئے کوششیں کی جا رہی ہیں۔ انہوں نے کہا کہ لوگوں نے وبا کے اس دور میں تحمل کا مظاہرہ کیا ہے اور ریاستی حکومت کو مکمل تعاون دیا ہے۔

ادھو ٹھاکرے نے اس موقع پر کنگنا تنازعہ پر کچھ نہیں کہا۔ انہوں نے کہا اس وقت میں سیاست پر بات کرنا پسند نہیں کروں گا۔ لیکن اس کا مطلب یہ نہیں ہے کہ میرے پاس جواب نہیں ہے۔ مہاراشٹرا کو بدنام کرنے کی کوشش کی جا رہی ہے۔ لہذا، میں مہاراشٹر کی بدنامی کے بارے میں بات کروں گا۔

ادھو نے کورونا کے معاملہ میں تعاون پر لوگوں کا شکریہ ادا کیا اور کہا کہ آپ کو کورونا سے خوفزدہ ہونے کی ضرورت نہیں، آپ خبردار رہیں، ہم ذمہ دار رہیں گے۔ کچھ ذمہ داری آپ اٹھائیں گے اور کچھ ہم اٹھائیں گے۔ واضح رہے کہ مہاراشٹرا وہ ریاست ہے جہاں ملک بھر میں سب سے زیادہ کورونا کیسز رپورٹ ہوئے ہیں۔

ادھو ٹھاکرے نے کہا کہ 15 ستمبر سے ہم ایک مہم شروع کر رہے ہیں۔ جو بھی مہاراشٹر سے محبت کرتے ہیں، ایسے تمام لوگ اس مہم میں اپنی ذمہ داری نبھائیں۔ مہاراشٹر ہمارا کنبہ ہے، اسے محفوظ رکھنا ہماری ذمہ داری ہے۔ اسی لئے ہم نے اس مہم کا نام 'میرا پریوار، میری ذمہ داری' رکھا ہے۔

ادھر، اداکارہ کنگنا راناوت، شیو سینا اور مہاراشٹرا حکومت کے مابین کشیدگی پر ادھو ٹھاکرے نے اپنے خطاب میں نہ ہی کنگنا کے بارے میں کچھ کہا اور نہ ہی ریٹائرڈ نیوی افسر کی شیو سینا کے کارکنان کی طرف سے کی گئی پٹائی پر۔ ادھر، ممبئی کا پی او کے سے موازنہ کرنے والی کنگنا نے ریاست کے گورنر بھگت سنگھ کوشیاری سے ملاقات کی ہے۔ سمجھا جا رہا ہے کہ انہوں نے گورنر سے شیوسینا اور ادھو ٹھاکرے کی شکایت لگائی۔ تاہم شیو سینا کا کہنا ہے کہ ان کے لئے کنگنا کا باب اب ختم ہو چکا ہے۔