بچوں کے خلاف جرائم، انسانیت کے خلاف جرائم: پولیس کمشنر حیدرآباد

حیدرآباد: کمشنر آف پولیس حیدرآباد انجنی کمار نے کہا ہے کہ بچوں کے خلاف جرائم، مغربی دنیا میں کافی زیادہ ہیں تاہم ہمارے سماج میں بھی خراب لوگ ہیں۔ یہ ہماری اجتماعی ذمہ داری ہے کہ ایسے جرائم کی روک تھام کے لئے بیداری پیدا کریں۔ انہوں نے کہا کہ بچوں کو اچھی طرح جاننے والے لوگ ہی ایسے جرائم کی وارداتیں انجام دیتے ہیں۔

کمشنر آف پولیس حیدرآباد جو روزانہ مختلف امور پر شہریوں میں سوشل میڈیا کے اہم پلیٹ فارم ٹوئٹر پر اپنی ویڈیوز اور پیام کے ذریعہ بیداری پیدا کرنے کا کام کرتے ہیں، نے اسی سلسلہ کی کڑی کے حصہ کے طورپر آج بھی ایک ویڈیو پوسٹ کیا۔ اس ایک منٹ 32 سکنڈ کی ویڈیو میں انہوں نے کہا ’’ہر سماج میں ایسے لوگ ہوتے ہیں جو بچوں کے خلاف جرائم کی وارداتیں انجام دیتے ہیں۔ ہندوستان کے بڑے شہروں جیسے ممبئی، دہلی، بنگلورو، حیدرآباد اور چنئی میں بھی ایسے لوگ موجود ہیں جو بچوں کے خلاف جرائم کی وارداتیں انجام دیتے ہوئے پائے گئے ہیں۔‘‘

انجنی کمار نے کہا کہ وہ سمجھتے ہیں کہ بچوں کے خلاف جرائم، انسانیت کے خلاف جرائم ہیں اور ہماری یہ ذمہ داری ہے کہ ہمارے سماج کے ہر بچہ کو تحفظ ہو اور وہ محفوظ رہیں۔ انہوں نے والدین پر زور دیتے ہوئے کہا کہ ان کو یہ سکھایا جائے کہ بچوں کو بڑوں کی جانب سے اچھی طرح چھونا اور غلط طریقہ سے چھونا کیا ہے؟ ان کو محبت سے چھونا کیسا ہے اور ان کو دوسرے مقصد کے تحت چھونا کیسا ہے؟

انہوں نے کہا کہ اس سلسلہ میں پولیس کا کونسلنگ سنٹر ہے۔ پولیس کی جانب سے اس سلسلہ میں بیداری مہم چلائی جارہی ہے۔ اگر شہری چاہتے ہیں تو پولیس ان کے پاس پہنچ کر اس تعلق سے بات کرسکتی ہے۔اس کے لئے پولیس کے پاس ماہرین بھی موجود ہیں۔