’ ووٹ چوری‘ کے خلاف کانگریس کا مظاہرہ آج، راہل گاندھی اور دیگر اہم لیڈران سے گلزار ہوگا رام لیلا میدان

ہندوستان کے انتخابی عمل میں مبینہ دھاندلی اور’ووٹ چوری‘ کے خلاف کانگریس نے اپنی مہم مزید تیز کر نے کے عزائم کا اظہار کیا ہے۔ اس سلسلے میں پارٹی اتوار (14 دسمبر 2025 ) کو دہلی کے رام لیلا میدان میں ایک عظیم  الشان ریلی کا انعقاد کررہی ہے جس کے ذریعہ کانگریس حکومت اور الیکشن کمیشن پر ملی بھگت کا الزام لگا تے ہوئے انہیں کٹگھرے میں کھڑا کرے گی۔

اس ریلی کو کانگریس اعلیٰ قیادت جیسے قومی صدرملک ارجن کھڑگے، لوک سبھا میں اپوزیشن لیڈرراہل گاندھی خطاب کریں گے۔ اس کے علاوہ کانگریس جنرل سیکریٹری پرینکا گاندھی واڈرا، کے سی وینو گوپال، جے رام رمیش اور سچن پائلٹ سمیت کئی سینئر لیڈر بھی اسٹیج پر موجود ہوں گے۔ کانگریس پارٹی کی سابق صدر سونیا گاندھی کے بھی اس عظیم ریلی میں شامل ہونے کا امکان ظاہرکیا جارہا ہے۔

اس سلسلے میں کانگریس جنرل سکریٹری (تنظیمی) کے سی وینوگوپال نے کہا کہ پارٹی نے ’ووٹ چوری‘ کے خلاف ملک گیر پیمانے پر مہم کے ذریعے تقریباً 5.5 کروڑ دستخط  حاصل کیے ہیں۔ انہوں نے کہا کہ راہل گاندھی نے ثبوت کے ساتھ دکھایا ہے کہ ووٹ چوری کیسے ہو رہی ہے۔ انہوں نے وزیر داخلہ کو اس معاملے پر کھلی بحث کا چیلنج بھی دیا ہے لیکن حکومت کی طرف سے کوئی جواب نہیں آیا ہے۔

وینو گوپال نے کہا کہ ریلی کے بعد کانگریس صدرجمہوریہ سے ملاقات کی درخواست کرے گی اور انہیں 5.5 کروڑ دستخطوں پر مشتمل میمورنڈم پیش کرے گی۔ پارٹی کا کہنا ہے کہ یہ تحریک جمہوریت اور منصفانہ انتخابات کے تحفظ کے لیے ہے۔ یہ ریلی لوک سبھا میں انتخابی اصلاحات اور ووٹر لسٹوں کے اسپیشل انٹینسیو ریویژن (ایس آئی آر) پر حکومت اور اپوزیشن کے درمیان گرما گرم بحث کے چند دن بعد ہورہی ہے۔ کانگریس نے انتخابی عمل میں سنگین بے ضابطگیوں کا الزام لگایا ہے۔

کانگریس ایم پی عمران پرتاپ گڑھی نے دعویٰ کیا ہے کہ اس ریلی میں لاکھوں لوگ شرکت کریں گے۔ انہوں نے کہا کہ ملک بھر سے کانگریس کارکنان کے ساتھ ساتھ سماجی کارکن بھی رام لیلا میدان میں جمع ہوں گے۔ انہوں نے یہ اشارہ بھی دیا کہ ’عظیم اتحاد‘ میں شامل پارٹیوں کے رہنما بھی شرکت کر سکتے ہیں۔

کانگریس لیڈر سچن پائلٹ نے کہا کہ یہ ریلی ’’ووٹ چور گڈی چھوڑ ‘‘ کے نعرے کے ساتھ منعقد کی جارہی ہے کیونکہ الیکشن کمیشن غیر جانبداری سے کام نہیں کررہا ہے۔ اسی طرح بھوپیش بگھیل نے الزام لگایا کہ بی جے پی اور الیکشن کمیشن مل کر جمہوریت کو کمزور کر رہے ہیں۔ کانگریس لیڈر ادت راج نے ریلی کو عوامی تحریک قرار دیتے ہوئے کہا کہ یہ صرف پارٹی کا پروگرام نہیں ہے بلکہ لوگوں کے حقوق اور جمہوریت کے تحفظ کی لڑائی ہے۔ انہوں نے عام شہریوں سے بھی ریلی میں شامل ہونے کی اپیل کی۔