مرکزنے ڈاکٹر منموہن سنگھ کی آخری رسوم اور یادگار بنانے کو لے کر غیر ضروری تنازعہ پیدا کیا: اشوک گہلوت

کانگریس کے سینئر رہنما اور راجستھان کے سابق وزیر اعلیٰ اشوک گہلوت نے ہفتہ کو سابق وزیر اعظم ڈاکٹر منموہن سنگھ کے یادگاری مقام کے معاملے پر بیان دیا ہے۔ انہوں نے کہا کہ پوری دنیا میں ڈاکٹر منموہن سنگھ کی عزت ہے، جب وہ بولتے تھے تو دنیا سنتی تھی۔ مرکزی حکومت ان کی یادگار بنانے کے لیے سیاست کر رہی ہے۔ کانگریس رہنما نے منموہن سنگھ کے آخری سفر کے لیے راج گھاٹ میں زمین الاٹمنٹ کو لے کر مرکزی حکومت کی وضاحت پر کہا کہ جب زمین دینا ہی تھا تو پہلے ہی کیوں نہیں اعلان کیا؟ جب پورے ملک سے آواز اٹھنے لگی تب جاکر حکومت نے اعلان کیوں کیا؟

انہوں نے کہا کہ این ڈی اے حکومت نے ڈاکٹر منموہن سنگھ جی جیسی عظیم شخصیت کی آخری رسوم اور یادگار بنانے کو لے کر غیر ضروری تنازعہ پیدا کیا ہے۔ جس شخصیت کی پوری دنیا میں عزت کی جا رہی ہے، اس شخص کی آخری رسوم حکومت ہند کسی خاص مقام کی جگہ نگم بودھ گھاٹ پر کروا رہی ہے۔

اشوک گہلوت نے کہا کہ سال 2010 میں ہماری حکومت نے بی جے پی کے ذریعہ مطالبہ کیے جانے کے بغیر ہی سابق نائب صدر جمہوریہ بھیروں سنگھ شیخاوت کے انتقال کے بعد ان کے کنبہ سے بات کرکے جئے پور میں ان کی آخری رسوم کے لیے فوراً خصوصی جگہ دستیاب کرائی اور وہیں یادگار کی تعمیر کروائی گئی۔ کانگریس حکومت نے 2012 میں مہاراشٹر میں بال ٹھاکرے کے انتقال کے بعد ممبئی کے شیواجی پارک میں خصوصی مقام دستیاب کرا کر آخری رسوم کی ادائیگی کروائی تھی۔

گہلوت نے آگے کہا کہ کانگریس نے ہمیشہ سبھی پارٹیوں کے رہنماؤں کو احترام کے ساتھ وداعی دی لیکن بی جے پی کے ذریعہ ڈاکٹر منموہن سنگھ کے ساتھ ایسا رویہ افسوسناک ہے۔ آج ان کے انتقال پر پورے ملک میں سوگ کا ماحول ہے۔ جب ملک کے لوگوں نے حکومت کے اس قدم پر ناراضگی کا اظہار کیا تب عوامی جذبات کے دباؤ میں بی جے پی حکومت مستقبل میں یادگار بنانے کا اعلان کر رہی ہے۔