بہار اسمبلی انتخابات: پہلے مرحلہ میں تقریباً 64.46 فیصد ووٹنگ درج، 1314 امیدواروں کی قسمت کا فیصلہ ای وی ایم میں قید

بہار میں 121 اسمبلی سیٹوں کے لیے پہلے مرحلہ کی پولنگ آج شام ختم ہو گئی۔ الیکشن کمیشن نے میڈیا کو جانکاری دیتے ہوئے بتایا کہ پہلے مرحلہ میں فوری طور پر جو اطلاع ملی ہے، اس کے مطابق تقریباً 64.46 فیصد ووٹنگ ہوئی ہے۔ کچھ مقامات پر ووٹنگ کا وقت ختم ہونے کے بعد بھی حق رائے دہی کا استعمال جاری ہے، یعنی ووٹنگ فیصد میں مزید اضافہ ممکن ہے۔ الیکشن کمیشن نے پہلے مرحلہ میں پُرامن ووٹنگ کا دعویٰ بھی کیا ہے۔

بہار میں پہلے مرحلہ کی پولنگ جاری ہے اور شام 5 بجے تک 60.13 فیصد ووٹنگ ہوئی ہے۔ بیگوسرائے میں 67.32، بھوجپور میں 53.24، بکسر میں 55.10، دربھنگہ میں 58.38، گوپال گنج میں 64.96، کھگڑیا میں 60.65، لکیسرائے میں 62.76، مدھے پورہ میں 65.74، منگر میں 54.90، مظفرپور میں 64.63، نالندہ میں 57.58، پٹنہ میں 55.02، سہرسا میں 62.65، سماس تی پور میں 66.65، سارن میں 60.90، شیخ پورہ میں 52.36، سیوان میں 57.41، اور ویشالی ضلع میں 59.45 فیصد ووٹنگ درج کی گئی ہے۔ کچھ مقامات پر ووٹرس اب بھی قطار بند ہیں۔

بہار اسمبلی انتخابات 2025 کے پہلے مرحلہ میں صبح 7 بجے ووٹنگ جاری ہے اور سہ پہر 3 بجے تک 53.77 فیصد ووٹروں نے اپنے حق رائے دہی کا اظہار کر لیا تھا۔

بہار میں اسمبلی انتخابات 2025 کے لیے پہلے مرحلہ کی ووٹنگ کا سلسلہ جاری ہے۔ الیکشن کمیشن کے مطابق دوپہر ایک بجے تک 42.31 فیصد ووٹنگ ریکارڈ کی گئی۔ اعداد و شمار کے مطابق دوپہر ایک بجے تک لالو یادو کے آبائی ضلع گوپال گنج میں سب سے زیادہ 46.37 فیصد ووٹنگ درج کی گئی، اس کے بعد مظفر پور میں 45.41 فیصد ووٹروں نے اپنے حق رائے دہی کا استعمال کر لیا تھا۔

بہار اسمبلی انتخابات کے پہلے مرحلے کی ووٹنگ کے دوران راشٹریہ جنتا دل (آر جے ڈی) نے الزام لگایا ہے کہ بی جے پی کارکنوں نے اس کے ایک کارکن پر چاقو سے حملہ کیا۔ پارٹی نے سوشل میڈیا پلیٹ فارم ’ایکس‘ پر تحریر کیا، ’’ہار کی ہتاشا میں بھاجپائیوں کی غنڈہ گردی شروع! مریچا چوک، سرائے میں آر جے ڈی کارکن پر بی جے پی کے غنڈوں اور اس کے بھائی نے چاقو سے حملہ کیا۔‘‘ پارٹی نے الیکشن کمیشن سے مطالبہ کیا ہے کہ ’’ان مجرموں کی فوری گرفتاری عمل میں لائی جائے تاکہ کمیشن اپنی غیر جانب داری ثابت کر سکے۔‘‘

آر جے ڈی نے ایک اور پوسٹ میں دعویٰ کیا کہ محی الدین نگر اسمبلی حلقہ کے بوتھ نمبر 106، 107 اور 108 پر پولیس اہلکار مختلف گھروں میں گھس کر ووٹروں کو بلا جواز مار پیٹ اور دھمکیاں دے رہے ہیں۔ پارٹی نے کہا کہ اس طرح کی کارروائیاں صاف شفاف انتخابات کے اصولوں کے منافی ہیں اور ووٹروں میں خوف پیدا کرنے کی کوشش کی جا رہی ہے۔

آر جے ڈی نے الیکشن کمیشن اور بہار کے چیف الیکٹورل آفیسر سے مطالبہ کیا کہ ان واقعات کی غیر جانبدارانہ جانچ کی جائے اور انتخابی عمل میں مداخلت کرنے والے عناصر کے خلاف فوری کارروائی کی جائے۔ پارٹی نے عوام سے اپیل کی ہے کہ وہ ڈر کے ماحول میں بھی اپنے ووٹ کا حق ضرور استعمال کریں۔

بہار کی کل 243 اسمبلی نشستوں میں سے 121 پر آج 2025 کے ریاستی اسمبلی انتخابات کے پہلے مرحلے کے تحت ووٹنگ ہو رہی ہے۔ صبح 11 بجے تک ریاست میں اوسط ووٹنگ 27.65 فیصد درج کی گئی۔ ضلع بیگو سرائے میں سب سے زیادہ 30.37 فیصد پولنگ ریکارڈ ہوئی، جبکہ ریاستی راجدھانی پٹنہ میں سب سے کم 23.71 فیصد ووٹنگ ہوئی۔

بہار اسمبلی انتخابات کے پہلے مرحلے کی ووٹنگ کے درمیان راشٹریہ جنتا دل (آر جے ڈی) کے صدر اور سابق وزیر اعلیٰ لالو پرساد یادو نے ووٹروں سے اپنے خاص انداز میں اپیل کی۔ لالو یادو نے سوشل میڈیا پلیٹ فارم ’ایکس‘ پر لکھا، ’’توا کی روٹی پلٹتے رہنی چاہیے، نہیں تو جل جائے گی۔ 20 سال بہت ہو گئے! اب نوجوان حکومت اور نئے بہار کے لیے تیجسوی حکومت نہایت ضروری ہے۔‘‘

آر جے ڈی کے آفیشل ’ایکس‘ ہینڈل پر بھی ووٹروں سے اپیل کرتے ہوئے لکھا گیا، ’’یاد رکھئے، تیجسوی کی گارنٹی ہی آپ کی خوشیوں کی گارنٹی ہے۔ تیجسوی یادو جی کی گارنٹی سے ہی آپ کا خاندان ترقی کرے گا، خوشحال، مضبوط اور محفوظ رہے گا۔ کسی بھی طرح کی باتوں میں نہ آئیں — صرف سرکاری نوکری، روزگار، تبدیلی، صنعتوں کے قیام اور بہار کی تیز رفتار ترقی کے لیے ہی ووٹ کریں۔‘‘

بہار اسمبلی انتخابات کے پہلے مرحلے کی ووٹنگ کے درمیان راشٹریہ جنتا دل (آر جے ڈی) کے صدر اور سابق وزیر اعلیٰ لالو پرساد یادو نے ووٹروں سے اپنے خاص انداز میں اپیل کی۔

لالو یادو نے سوشل میڈیا پلیٹ فارم ’ایکس‘ پر لکھا:

’’توا کی روٹی پلٹتے رہنی چاہیے، نہیں تو جل جائے گی۔ بیس سال بہت ہو گئے! اب نوجوان حکومت اور نئے بہار کے لیے تیجسوی حکومت نہایت ضروری ہے۔‘‘

بہار اسمبلی انتخاب 2025 کے پہلے مرحلے کے لیے ووٹنگ جاری ہے۔ ریاست کے مختلف اضلاع میں ووٹنگ کا آغاز پُرجوش انداز میں ہوا۔ صبح 9 بجے تک کے اعداد و شمار کے مطابق تقریباً 13.13 فیصد ووٹنگ ریکارڈ کی گئی ہے۔ ریاست کے مختلف اضلاع میں ووٹنگ کے رجحان میں فرق دیکھا گیا۔ سہرسا ضلع 15.27 فیصد ووٹنگ کے ساتھ سب سے آگے رہا، جبکہ لکھی سرائے ضلع میں ووٹنگ کی رفتار سب سے کم رہی، جہاں صرف 7.00 فیصد ووٹ ڈالے گئے۔

اضلاع میں ووٹنگ کی صورتحال:
ریاست کے اوسط 13.13 فیصد سے زیادہ ووٹنگ والے اضلاع میں بیگوسرائے (14.60 فیصد)، مظفرپور (14.38 فیصد)، ویشالی (14.30 فیصد)، کھگڑیا (14.15 فیصد)، گوپال گنج (13.97 فیصد) اور مدھے پورہ (13.74 فیصد) شامل ہیں۔
اسی طرح مونگیر (13.37 فیصد)، سیوان (13.35 فیصد)، سارن (13.30 فیصد) اور بکسر (13.28 فیصد) میں بھی اوسط کے قریب ووٹنگ ہوئی ہے۔

ریاستی راجدھانی پٹنہ میں ووٹنگ کا تناسب 11.22 فیصد رہا، جو ریاستی اوسط سے کم ہے۔ نالندہ میں 12.45 فیصد اور دربھنگہ میں 12.48 فیصد ووٹنگ ریکارڈ کی گئی۔

پرینکا گاندھی نے ایکس پر بہار کے عوام سے اپیل کرتے ہوئے کہا، ’’بہار کے میرے پیارے بھائیو، بہنو، ماؤں اور نوجوانو! آج اپنے ہاتھوں سے اپنا مستقبل طے کرنے کا دن ہے۔ بڑی تعداد میں نکل کر جمہوریت کے اس عظیم تہوار میں حصہ لیجیے۔ نوکری، تعلیم، صحت اور بہار کے روشن مستقبل کے لیے، اپنی جمہوریت، آئین اور ووٹ کے حق کے تحفظ کے لیے ووٹ دیجیے۔‘‘

وزیر اعظم نریندر مودی نے ایکس پر پوسٹ کرتے ہوئے کہا کہ آج بہار میں جمہوریت کے جشن کا پہلا مرحلہ ہے۔ انہوں نے اس مرحلے کے تمام ووٹروں سے اپیل کی کہ وہ بھرپور جوش و خروش کے ساتھ ووٹ ڈالیں۔ مودی نے پہلی بار ووٹ ڈالنے والے نوجوانوں کو خصوصی مبارکباد دیتے ہوئے کہا، ’’یاد رکھنا ہے — پہلے مت دان (ووٹنگ)، پھر جل پان (کھنا پینا)!‘‘

آر جے ڈی لیڈر اور مہاگٹھ بندھ کے وزیر اعلیٰ عہدے کے امیدوار تیجسوی یادو نے ووٹروں سے اپیل کی ہے کہ وہ ہر حال میں اپنا حق رائے دہی استعمال کریں۔ ایک ویڈیو پیغام میں انہوں نے کہا کہ ’’بہار کی اگلی سمت آپ کے ووٹ سے طے ہوگی، اس لیے جمہوریت کو مضبوط بنانے کے لیے ووٹ ڈالنا فرض ہے۔‘‘

پٹنہ: بہار اسمبلی انتخابات کے پہلے مرحلے کے لیے ووٹنگ جمعرات کی صبح 7 بجے ریاست کے 18 اضلاع میں شروع ہو گئی۔ اس مرحلے میں کل 121 اسمبلی حلقے شامل ہیں، جہاں 1314 امیدوار میدان میں ہیں۔ ان امیدواروں میں 1192 مرد اور 122 خواتین شامل ہیں۔

الیکشن کمیشن کے مطابق، پہلے مرحلے میں 3 کروڑ 75 لاکھ 13 ہزار 302 ووٹر اپنے حق رائے دہی کا استعمال کر رہے ہیں۔ ان میں ایک کروڑ 98 لاکھ 35 ہزار 325 مرد، ایک کروڑ 76 لاکھ 77 ہزار 219 خواتین اور 758 تیسری جنس کے ووٹر شامل ہیں۔ یہی ووٹر ان 1314 امیدواروں کی قسمت کا فیصلہ کریں گے۔

انتخابات کے آغاز سے قبل صبح 5 بجے سے 7 بجے کے درمیان ماک پولنگ کی گئی تاکہ ای وی ایم مشینوں کی جانچ ہو سکے۔ دربھنگہ کے پریزائیڈنگ افسر ششی کمار کے مطابق تمام انتظامات مکمل ہیں، کہیں کوئی تکنیکی مسئلہ نہیں آیا۔ ویشالی، مہوا اور پٹنہ کالج کے پولنگ مراکز سے بھی ایسی ہی رپورٹ ملی ہے۔ الیکشن کمیشن نے بتایا کہ تمام مراکز پر سکیورٹی فورسز تعینات ہیں اور عملہ پوری طرح چوکس ہے۔