’اسکل ڈیولپمنٹ‘ معاملہ میں چندرابابو نائیڈو کو بڑی راحت، ای ڈی نے دی کلین چٹ

انفورسمنٹ ڈائریکٹوریٹ نے آندھرا پردیش اسٹیٹ اسکل ڈیولپمنٹ کارپوریشن (اے پی ایس ایس ڈی سی) سیمنز پروجیکٹ معاملے میں ایک نئی چارج شیٹ داخل کی ہے۔ اس میں کہا گیا ہے کہ کچھ ملزمان نے سرکاری فنڈ کو ڈائیورٹ کیا تھا، لیکن جرم کی کمائی کی منی لانڈرنگ میں وزیر اعلیٰ چندرا بابو نائیڈو کا کوئی کردار نہیں پایا گیا۔

واضح رہے کہ گزشتہ ’وائی ایس آر سی پی‘ کی قیادت والی آندھرا پردیش حکومت کے وزیر اعلیٰ جگن موہن ریڈی نے ستمبر 2023 میں اس معاملے میں نائیڈو کو گرفتار کیا تھا، جس میں الزام عائد کیا گیا تھا کہ اس منصوبہ میں بے ضابطگیوں کی وجہ سے ریاست کے خزنے کو 300 کروڑ روپے کا نقصان ہوا ہے۔ چندرا بابو نائیڈو نے راجامہیندرورم سنٹرل جیل میں 50 سے زائد دن گزارے تھے، اس کے بعد آندھرا پردیش ہائی کورٹ نے انہیں 31 اکتوبر 2023 کو ضمانت دے دی تھی۔

وجے واڑہ کی ایک مقامی عدالت نے بھی حال ہی میں ریاستی سی آئی ڈی کی جانب سے اس معاملے میں دائر کلوزر رپورٹ قبول کر لی اور نائیڈو کے خلاف تحقیقات بند کر دی۔ ای ڈی کا معاملہ سی آئی ڈی کی ایف آئی آر پر مبنی ہے۔ افسران کے مطابق وفاقی تحقیقاتی ایجنسی نے اپنی ضمنی چارج شیٹ میں کہا ہے کہ اس کی تحقیقات میں اس معاملے میں جرم کی کمائی کی لانڈرنگ میں نائیڈو کا کوئی کردار نہیں پایا گیا۔ اس لیے انہیں مذکورہ شکایت میں ملزم کے طور پر نامزد نہیں کیا گیا۔

واضح رہے کہ ای ڈی نے ہفتہ (31 جنوری) کو جاری ایک بیان میں کہا کہ عدالت نے 28 جنوری کو اس نئی شکایت کا نوٹس لیا۔ اسکل ڈیولپمنٹ پروجیکٹ میں سینٹر آف ایکسیلنس (سی او ای ایس) کے کلسٹر قائم کرنا شامل تھا، جس کی کل پروجیکٹ لاگت 3300 کروڑ روپے تخمینہ کی گئی تھی۔ نئی چارج شیٹ ملزم کمپنی ڈیزائنٹیک سسٹمز پرائیویٹ لمیٹڈ (ڈی ٹی ایس پی ایل)، اس کے ایم ڈی وکاس کھانویلکر، سیمیز انڈسٹری سافٹ ویئر انڈیا پرائیویٹ لمیٹڈ کے سابق ایم ڈی سومیادری شیکھر بوس عرف سمن بوس اور ان کے قریبی ساتھیوں مکل چندر اگروال، سریش گوئل اور کچھ دیگر کے خلاف نئی چارج شیٹ داخل کی گئی ہے۔

ای ڈی نے بیان میں الزام عائد کیا کہ کھانویلکر، بوس، اگروال اور گوئل نے فرضی (شیل) اور بند کمپنیوں کی مدد سے ملٹی-لیئر ٹرانزیکشن کے ذریعے سرکاری فنڈ کو ڈائیورٹ کیا، سامان اور خدمات کی فراہمی کے بہانے فرضی انوائسز کی بنیاد پر فنڈز ہڑپ کر لیے۔ اس میں کہا گیا ہے کہ فنڈز ڈائیورزن کے لیے انٹری فراہم کرنے والوں کی خدمات لی گئیں، جس کے بدلے انہیں کمیشن دیا گیا۔ ایجنسی کے مطابق ان چاروں کو ای ڈی نے 2023 میں گرفتار کیا تھا اور اس معاملہ میں منسلک جائیداد کی کل مالیت 54.74 کروڑ روپے ہے۔ افسران نے بتایا کہ جب تک کوئی نیا ثبوت سامنے نہیں آتا، یہ اس معاملے میں ای ڈی کی آخری چارج شیٹ ہے۔

واضح رہے کہ وجے واڑہ کورٹ کی جانب سے کیس بند کیے جانے کے بعد ’وائی ایس آر سی پی‘ کے سینئر لیڈر اور سابق وزیر کے کنّابابو نے ٹی ڈی پی کی زیر قیادت این ڈی اے حکومت پر الزام عائد کیا کہ وہ نائیڈو کے خلاف درج مقدمات میں تحقیقاتی ایجنسیوں کو متاثر کر رہی ہے اور منظم طریقے سے مقدموں کو بند کروا رہی ہے۔ قابل ذکر ہے کہ چندرا بابو نائیڈو کی ٹی ڈی پی، مرکز میں مودی حکومت کی قیادت والے این ڈی اے کی اتحادی ہے۔