آئی پی ایل 2020: پنجاب سے شکست کے بعد کولکاتا کے کپتان مورگن کا بیان آیا سامنے

شارجہ: کنگز الیون پنجاب کے خلاف آٹھ وکٹوں سے ہارنے کے بعد کولکتہ نائٹ رائیڈرز کے کپتان ایون مورگن نے کہا ہے کہ ان کی ٹیم متواتر وقفے سے وکٹیں گنواتی رہی اس لئے وہ بڑا اسکور نہیں کرسکے۔ کولکاتا نے 20 اوورز میں 9 وکٹوں کے نقصان پر 149 رنز بنائے تھے۔ پنجاب نے دو وکٹیں گنوا کر ہدف حاصل کرلیا۔

اس میچ میں عمدہ کارکردگی کے سبب کرس گیل کو مین آف دی میچ کا ایوارڈ دیا گیا۔ گیل نے 29 گیندوں پر 51 رنز بنائے۔ اپنی اننگز کے دوران انہوں نے 2 چوکے اور پانچ چھکے لگائے۔کولکتہ کی شروعات بہت خراب تھی اور ٹیم 10 رنز پر تین وکٹیں گنوا بیٹھی۔ اس کے بعد 57 رنز بنانے والے کپتان مورگن اور شبھمن گل نے 81 رنز کی شراکت کی لیکن ان دونوں کے بعد ٹیم دوبارہ اپنی تال سے محروم ہوگئی۔

میچ کے بعد مورگن نے کہا کہ اگر آپ جلد وکٹ کھو دیتے ہیں خاص طور پر شارجہ میں تو آپ کو جوابی حملہ کا سامنا کرنا پڑے گا۔ میں مایوس ہوں کہ ہماری شراکت زیادہ آگے نہیں بڑھ سکی۔انہوں نے کہا کہ ہم نے تین وکٹیں گنوا دی تھیں۔ یہ شراکت کی بات تھی۔ ہمارا خیال تھا کہ ہم 185-190 تک پہنچ جائیں گے۔ میچ جیتنا ایک مقصد ہوتا لیکن ایسا نہیں ہوسکا، ہم وکٹیں مسلسل گنواتے رہے۔

واضح رہے کہ کولکتہ نائٹ رائیڈرز کی ٹیم کنگز الیون پنجاب کے خلاف شکست کے بعد پانچویں نمبر پر آگئی ہے۔ کے کے آر نے اس سیزن میں اب تک 12 میچ کھیلے ہیں جن میں سے انہوں نے 6 میچ جیتے ہیں۔ جبکہ 6 میں انہیں شکست کا سامنا کرنا پڑا ہے۔