پٹنہ یونیورسٹی میں شعبۂ اردو کا ماحول مجموعی طور پر سنجیدہ، لیکن چیلنجز سے خالی نہیں: ڈاکٹر افشاں بانو

یہ تجربہ میرے لیے فخر اور اعزاز کے ساتھ خوشی اور ذمہ داری کا احساس دلاتا ہے۔ جس جگہ آپ نے تعلیم حاصل کی ہو، اسی جگہ بطور استاد خدمات انجام دینا کسی خواب کی تعبیر سے کم نہیں۔ 1917 میں قائم ہونے والی اس یونیورسٹی کا شمار برصغیر کی قدیم ترین یونیورسٹیوں میں ہوتا ہے۔ جس یونیورسٹی سے کلیم الدین احمد (شعبۂ انگریزی)، اختر اورینوی، جمیل مظہری، کلیم عاجز جیسے افراد کا رشتہ رہا ہو، وہاں تعلیم حاصل کرنا ہی بڑی بات تھی اور پھر وہاں آپ کو تدریسی خدمات انجام دینے کا موقع میسر آ جائے، یہ نعمت سے کم نہیں۔ اس تعلیمی روایت کا حصہ بننا میرے لیے فخر کی بات ہے۔ اس تقرری نے نہ صرف میرے اعتماد میں اضافہ کیا ہے بلکہ طالب علم سے معلم تک کا یہ سفر میرے اس احساس ذمہ داری کو مزید گہرا کر دیتا ہے کہ اب مجھے آنے والی نسلوں کے لیے اس سے بہتر رہنمائی، خلوص اور دیانت کے ساتھ تعلیم فراہم کرنا ہے جسے میں نے اس ادارے میں حاصل کیا تھا۔

ایسی بات نہیں ہے۔ اردو ڈائرکٹوریٹ میں تقرری سے قبل بھی میں ایک متحرک اور فعال ادارے بزمِ صدف انٹرنیشنل سے جڑی ہوئی تھی۔ وہاں سے نکلنے والے سہ ماہی رسالہ ’صدف‘ کی میں معاون مدیر رہی ہوں، ساتھ ہی اس کے زیر اہتمام منعقد ہونے والی مختلف تقریبات کا حصہ بھی رہی ہوں۔ یہی تجربہ مجھے اردو ڈائرکٹوریٹ کے رسالہ ’بھاشا سنگم‘ کی ادارت اور مختلف پروگراموں کے انعقاد کے سلسلے میں کار آمد ثابت ہوا۔ اور اب ان سارے تجربات کا فائدہ شعبۂ ارددو، پٹنہ یونیورسٹی میں تدریس و تحقیق کے دوران مجھے ہو رہا ہے۔ پٹنہ یونیورسٹی سے بھی ’اردو جرنل‘ تقریباً 16 برسوں سے تواتر کے ساتھ شائع ہو رہا ہے۔ میرے استاد ڈاکٹر شہاب ظفر اعظمی اس کے مدیر ہیں۔ درس و تدریس کے ساتھ اس رسالہ میں بھی میں مقدور بھر اپنا تعاون پیش کر رہی ہوں۔ ہمارے شعبہ کے ساتھ ساتھ بہار اور بالخصوص پٹنہ کی سطح پر جو ادبی پروگرام ہوتے ہیں، ان میں کبھی مقالہ نگار، کبھی ناظم اور کبھی منتظم کی حیثیت سے شرکت رہا کرتی ہے۔ پٹنہ کے باہر بھی ارریہ، مدھے پورہ، گیا، سیوان، جہان آباد وغیرہ مقامات پر پروگرام میں شرکت کے سلسلے میں جانا رہا۔ دہلی، حیدر آباد، راجستھان، کولکاتا، جھارکھنڈ جیسی جگہوں پر بھی مقالہ نگار کی حیثیت سے شریک ہو چکی ہوں۔

آپ نے بہت اچھا سوال کیا۔ پٹنہ یونیورسٹی میں شعبۂ اردو کا ماحول مجموعی طور پر سنجیدہ ہے، لیکن چیلنجز سے خالی نہیں ہے۔ یہ درست ہے کہ بہت سی جگہوں پر شعبۂ اردو تقریباً غیر فعال ہے، لیکن پٹنہ یونیورسٹی میں صورت حال اس قدر مایوس کن نہیں۔ یہاں ایم اے کے ایک سیشن کے لیے 40 سیٹیں مخصوص ہیں۔ ہمارے وقت تک تو سیٹ سے زیادہ طلبا ایپلائی کیا کرتے تھے اور بچوں کی لیاقت کے مطابق ان کو منتخب کیا جاتا تھا۔ حال کے دنوں میں اس میں کچھ کمی آئی ہے، پھر بھی 35-34 طلبا ایک سیشن میں داخلہ لیتے ہیں۔ طالب علموں کی تعداد میں کمی کی ایک وجہ یہ بھی ہے کہ ہمارے یہاں حاضری پر زور زیادہ دیا جاتا ہے اور کم حاضری ہونے کی صورت میں انھیں سی آئی اے امتحان میں بیٹھنے کی اجازت نہیں ملتی، جبکہ دوسری جگہوں پر طالب علموں کو اس معاملہ میں سختی کا سامنا نہیں کرنا پڑتا ہے۔

کورونا وبا سے قبل جب میں نے پٹنہ یونیورسٹی سے اپنی تعلیم مکمل کی، اس وقت کا تعلیمی ماحول ایک حد تک روایتی تھا۔ طالب علموں کی بیشتر سرگرمیاں لائبریری اور سیمینار تک محدود تھیں۔ حالانکہ میں نے اس وقت بھی ڈیجیٹل پلیٹ فارم سے کافی استفادہ کیا تھا، لیکن ہمارے یہاں اُس زمانے میں یہ عام نہیں تھا۔ اب جبکہ میں اپنے مادر علمی میں بحیثیت استاد واپس آئی ہوں، تو میں نے اپنی تدریس کے لیے نئے سرے سے منصوبے بنائے ہیں۔ تدریسی زندگی کا آغاز تو ریسرچ کے دوران ہی ہو گیا تھا۔ جونیر ریسرچ فیلو کی حیثیت سے مجھے شعبہ کی دوسری ذمہ داریوں کے ساتھ باقاعدہ ایم اے کی کلاس لینے کی ذمہ داری بھی سونپی گئی تھی اور پھر ریسرچ کے بعد بطور گیسٹ لکچرر بھی درس و تدریس کی خدمات انجام دی ہے، تو اب وہ روایتی انداز تھوڑا بدلا ہے۔ اب طالب علموں کو مضمون پڑھانے کے ساتھ ساتھ انھیں ذہنی طور پر متحرک رکھنا، ڈیجیٹل وسائل کے درست استعمال کی رہنمائی کرنا بھی ہماری ذمہ داریوں میں شامل ہو گیا۔

اردو کے بیشتر اساتذہ کا طریقۂ کار طالب علموں کو نصابی کتابوں اور امتحان کے نقطۂ نظر تک محدود رکھنا ہوتا ہے۔ میں یہ چاہتی ہوں کہ طلبا کو نصابی مضامین کو یاد کرنے کے بجائے ان کی دوستی متن سے ہو، جس سے کلاس روم میں سوال و جواب اوربحث و مباحثے کے ذریعے مضمون کی داخلی دنیا واضح ہو جائے۔ ساتھ ہی نصاب کے باہر کی دیگر ادبی سرگرمیوں میں بھی طلبا و طالبات کو شریک کیا جائے۔ مثلاً میری کوشش ہوتی ہے کہ کبھی ان کے درمیان کسی موضوع پر تقریری یا تحریری مقابلے کا انعقاد کیا جائے۔ کبھی بیت بازی تو کبھی نظم سنانے کا کوئی پروگرام بھی رکھا جائے، تاکہ بچوں میں تقریری اور تحریری صلاحیت تو پیدا ہو ہی، نئی نسل کی شعر فہمی سے جو دوری بڑھتی جا رہی ہے، وہ بھی کسی حد تک کم ہو۔ آج کے دور میں کمپوٹر کا علم حاصل کرنا بھی طالب علموں کے لیے از حد ضروری ہے۔ میں انھیں اس طرف بھی راغب کرنے کی کوشش کر رہی ہوں۔ میں چاہتی ہوں کم از کم کمپیوٹر کی اتنی استعداد ان میں پیدا ہو جائے کہ وہ اپنے مضامین اور مقالے خود ٹائپ کر کے اس کی تصحیح کر سکیں۔

درس و تدریس کے دوران میں اپنے ذاتی تجربات بھی شیئر کرنے کی کوشش کرتی ہوں۔ جب میں انھیں بتاتی ہوں کہ میں نے اسی کلاس روم اور جہاں ابھی آپ بیٹھے ہیں، انھی بنچوں سے گزر کر یہاں تک کا سفر طے کیا ہے، تو انھیں حوصلہ ملتا ہے اور ان کی آنکھوں میں آگے بڑھنے کی لگن بھی میں محسوس کرتی ہوں۔