ٹرمپ کو عدالت سے بڑا جھٹکا! امریکی عدالت نے ٹیرف غیر قانونی قرار دیے، صدر بولے- ’ملک کو تباہ کر دے گا یہ فیصلہ‘

واشنگٹن: امریکی اپیل کورٹ نے جمعہ کو صدر ڈونلڈ ٹرمپ کی جانب سے عائد کیے گئے بیشتر ٹیرف کو غیر قانونی قرار دے دیا۔ واشنگٹن ڈی سی میں قائم یو ایس کورٹ آف اپیلز فار دی فیڈرل سرکٹ نے اپنے فیصلے میں کہا کہ اگرچہ صدر کو قومی ایمرجنسی کے دوران کئی طرح کے اختیارات حاصل ہوتے ہیں لیکن ان میں ٹیرف یا محصولات عائد کرنے کا اختیار شامل نہیں ہے۔

یہ فیصلہ ٹرمپ کی معاشی حکمتِ عملی پر بڑا جھٹکا تصور کیا جا رہا ہے۔ عدالت نے البتہ 14 اکتوبر تک ٹیرف کو برقرار رکھنے کی اجازت دے دی ہے تاکہ انتظامیہ کو اس فیصلے کے خلاف سپریم کورٹ سے رجوع کرنے کا موقع مل سکے۔

فیصلے کے فوراً بعد صدر ڈونلڈ ٹرمپ نے ردعمل ظاہر کرتے ہوئے عدالت کو ’جانبدار‘ قرار دیا اور کہا کہ تمام ٹیرف بدستور نافذ رہیں گے۔ انہوں نے کہا، ’’اگر اس فیصلے کو ایسے ہی رہنے دیا گیا تو یہ امریکہ کے لیے تباہی ثابت ہوگا۔ ہم سپریم کورٹ کے ذریعے ان ٹیرف کو اپنے قومی مفاد میں استعمال کرتے رہیں گے۔‘‘

ٹرمپ نے اپنے سوشل میڈیا پلیٹ فارم ٹروتھ سوشل پر بھی بیان جاری کیا جس میں انہوں نے لکھا، ’’یہ فیصلہ امریکہ کے خلاف سازش ہے۔ ٹیرف اب بھی نافذ ہیں اور آخرکار جیت امریکہ کی ہی ہوگی۔ اگر یہ ٹیرف ہٹا دیے گئے تو یہ ملک کے لیے ایک بڑی آفت ہوگی۔‘‘

انہوں نے مزید کہا کہ غیر منصفانہ تجارتی پالیسیوں اور غیر ملکی رکاوٹوں نے امریکی کسانوں اور صنعت کاروں کو کمزور کیا ہے لیکن ٹیرف ہی وہ ذریعہ ہیں جن سے امریکہ دوبارہ مضبوط اور خود کفیل ہو سکتا ہے۔

یہ مقدمہ دراصل ٹرمپ کی جانب سے رواں سال اپریل میں عائد کیے گئے ’ریسپرکل ٹیرف‘ اور فروری میں چین، کینیڈا اور میکسیکو پر لگائے گئے محصولات سے متعلق تھا۔ تاہم عدالت نے واضح کیا کہ یہ فیصلہ ان ٹیرف پر لاگو نہیں ہوگا جو دیگر قوانین، مثلاً اسٹیل اور ایلومینیم پر لگائے گئے محصولات کے تحت نافذ ہیں۔

ٹرمپ انتظامیہ نے اپنے دفاع میں انٹرنیشنل ایمرجنسی اکنامک پاورز ایکٹ (آئی ای ای پی اے) کا حوالہ دیا، جو 1977 کا قانون ہے اور صدر کو غیر معمولی خطرات سے نمٹنے کے لیے ہنگامی اختیارات فراہم کرتا ہے۔ ٹرمپ پہلے امریکی صدر ہیں جنہوں نے اسی قانون کو بنیاد بنا کر ٹیرف عائد کیے۔ ان کا مؤقف ہے کہ بڑھتا ہوا تجارتی خسارہ، مقامی صنعت کی کمزوری اور نشہ آور اشیا کی اسمگلنگ قومی سلامتی کے لیے بڑا خطرہ ہیں۔

تاہم عدالت نے اپنے فیصلے میں کہا کہ کانگریس نے اس قانون کے ذریعے صدر کو ٹیرف عائد کرنے کا لامحدود اختیار دینے کا کبھی ارادہ نہیں کیا تھا۔ آئین کے مطابق محصولات اور ٹیکس لگانے کا اختیار صرف کانگریس کے پاس ہے اور اگر یہ اختیار صدر کو دیا بھی جاتا ہے تو وہ محدود اور واضح ہونا چاہیے۔

قابل ذکر ہے کہ اس سے قبل نیویارک کی یو ایس کورٹ آف انٹرنیشنل ٹریڈ نے بھی 28 مئی کو فیصلہ دیا تھا کہ ٹرمپ نے اپنے اختیارات سے تجاوز کرتے ہوئے ٹیرف نافذ کیے۔ اسی طرح ایک اور عدالت نے بھی آئی ای ای پی اے کے تحت ٹیرف لگانے کو غیر آئینی قرار دیا تھا۔ اب تک آٹھ مختلف مقدمات میں ٹرمپ کی ٹیرف پالیسی کو چیلنج کیا جا چکا ہے، جن میں ریاست کیلیفورنیا کا مقدمہ بھی شامل ہے۔