تھائی لینڈ کی آئینی عدالت نے وزیر اعظم شنواترا کو عہدہ سے کیا معطل، اپنی ہی عوام پر غلط تبصرہ کا الزام

تھائی لینڈ کی ایک آئینی عدالت نے وزیر اعظم پیتونگٹارن شنواترا کو ان کے عہدہ سے معطل کر دیا ہے۔ ان پر فون کال کے دوران اپنے ملک کے لوگوں کے خلاف غلط تبصرہ کرنے کا الزام عائد کیا گیا ہے۔ اب اس پورے معاملے کی جانچ تک شنواترا وزیر اعظم عہدہ سے دستبردار رہیں گی۔ عدالت نے یہ فیصلہ ایک عرضی پر سماعت کرتے ہوئے سنایا۔

خبر رساں ایجنسی ایسو سی ایٹیڈ پریس کے مطابق تھائی لینڈ کی آئینی عدالت نے وزیر اعظم کے رویہ کو غلط مانا۔ ساتھ ہی عدالت نے کہا کہ جس طریقے سے شنواترا نے اپنے ہی ملک کے لوگوں کے خلاف تبصرہ کیا، وہ رویہ مناسب نہیں ہے۔ عدالتی حکم کے بعد شنواترا کے لیے آئندہ 15 دن انتہائی مشکل بھرے ہیں۔ دراصل عدالت نے جانچ ایجنسی سے کہا ہے کہ پوری جانچ کر 15 دن میں رپورٹ جمع کرائیں۔ اس رپورٹ کے بعد ہی آگے کی کارروائی ہوگی۔

غور کرنے والی بات یہ ہے کہ مقامی میڈیا کے مطابق شنواترا کے والد، جو کہ قبل میں ملک کے سربراہ رہے ہیں، ان پر بھی کیس درج کرنے کی تیاری ہو رہی ہے۔ شنواترا کے والد پر لوگوں کو راج شاہی کی طاقت پر کچلنے کا الزام ہے۔ یہ کیس 2016 کا ہے۔

بہرحال، سی این این کے مطابق تھائی لینڈ کی وزیر اعظم شنواترا نے اپنے دشمن ملک کمبوڈیا کے سینیٹ چیف ہُن سین کو فون لگایا تھا۔ اس فون کال میں شنواترا نے کمبوڈیا کے سینیٹ چیف کو انکل کہہ کر مخاطب کیا۔ فون پر بات چیت کے دوران شنواترا نے کہا کہ جو جنرل ابھی کمبوڈیا سرحد پر تعینات ہے، وہ میرے دشمن ہیں۔ اس لیے کمبوڈیا سے تنازعہ ہو رہا ہے۔ اس فون لیک نے پُرسکون تھائی لینڈ کی سیاست میں ہنگامہ برپا کر دیا ہے۔ اس تعلق سے شنواترا نے فوراً معافی مانگی، لیکن تب تک معاملہ عدالت پہنچ گیا۔ اب عدالت نے شنواترا کے عمل کو اخلاقیات کے خلاف مانتے ہوئے کارروائی شروع کر دی ہے۔