بنگلہ دیش: گرفتار چنمے پربھو سے ’اسکان‘ نے توڑا ناطہ، کہا ’اپنے بیان کے لیے وہ خود ذمہ دار‘

اسکان بنگلہ دیش کے جنرل سکریٹری چارو چندر داس نے کہا ہے کہ ’’اسکان چنمے کرشن داس کے کسی بھی بیان یا کارروائی کی ذمہ داری نہیں لیتا۔‘‘ انہوں نے ڈھاکہ میں ایک پریس کانفرنس کے دوران یہ وضاحت پیش کی اور کہا کہ ’’چنمے پربھو کو حال ہی میں (اسکان سے) نکال دیا گیا ہے۔‘‘ یہ بیان اس وقت آیا جب بنگلہ دیش میں ہندو لیڈر چنمے کرشنا داس کی گرفتاری کے بعد تنازعہ کافی گہرا ہو گیا۔ چنمے داس کو پیر کے روز چٹگاؤں میں بنگلہ دیش کے خلاف اشتعال انگیز بیان دینے کے معاملے میں گرفتار کر لیا گیا تھا۔ ساتھ ہی ان کے خلاف غداری کا معاملہ بھی درج کیا گیا تھا۔ ان کی گرفتاری کے بعد اسکان کے حامیوں اور اقلیتی طبقہ کے لوگوں نے بنگلہ دیش میں احتجاج شروع کر دیا تھا۔

چنمے داس کی گرفتاری کے بعد سے ہی بنگلہ دیش میں اسکان پر پابندی لگانے کی مانگ تیز ہو گئی۔ اسکان پر پابندی لگانے کے لیے بنگلہ دیش کی عدالت میں عرضی بھی داخل کی گئی تھی۔ حالانکہ عدالت نے اسکان پر پابندی لگانے سے انکار کر دیا ہے۔ ساتھ ہی عدالت نے یہ بھی کہا کہ بغیر واضح ثبوت کے اسکان پر پابندی نہیں لگائی جا سکتی۔ عدالت کے فیصلے کے بعد اسکان کے کولکاتا برانچ کے نائب صدر رادھا رمن داس نے اسے انصاف کی جیت بتائی ہے۔ انہوں نے کہا کہ ’’ہم پر پابندی لگانے کی کوشش کی جا رہی تھی لیکن عدالت نے اسے خارج کر دیا، یہ لاکھوں عقیدت مندوں کے لیے راحت کی بات ہے۔‘‘

قابل ذکر ہے کہ ہندوستان نے گزشتہ منگل کو ہی چنمے داس کی گرفتاری اور ضمانت نہیں دیے جانے پر گہری تشویش کا اظہار کیا تھا۔ بنگلہ دیش میں ہندوؤں اور دیگر اقلیتی طبقوں کی سیکورٹی کو یقینی بنانے کی حکومت ہند نے درخواست کی ہے۔ ہندوستان میں اہم اپوزیشن پارٹی کانگریس نے بھی بنگلہ دیش میں پیدا حالات پر اپنی تشویش کا اظہار کیا اور ہندو طبقہ کے تحفظ کو یقینی بنانے کا مطالبہ سامنے رکھا۔