سی بی آئی کرے گی انکیتا بھنڈاری قتل کیس کی جانچ، دوبارہ ایف آئی آر درج کرنے کا عمل شروع

اتراکھنڈ کے مشہور انکیتا بھنڈاری قتل کیس کی تحقیقات اب سنٹرل بیورو آف انویسٹی گیشن (سی بی آئی) کرے گی۔ مرکزی حکومت کی منظوری ملنے کے بعد ایجنسی نے کیس کو اپنے ہاتھ میں لینے کی کارروائی شروع کر دی ہے۔ اس سلسلے میں اب سی بی آئی ایک نئی ایف آئی آر درج کرے گی اور پورے واقعہ کی پھر سے تفصیلی جانچ کرے گی۔

اس معاملے میں ریاست بھر میں ہوئے احتجاج کے بعد اتراکھنڈ کے وزیراعلیٰ پشکر سنگھ دھامی نے 9 جنوری کو سی بی آئی جانچ کی کی سفارش کرنے کا اعلان کیا تھا۔ اس کے بعد ریاستی حکومت نے مرکزی حکومت کو تجویز بھیجی جسے اب منظور کر لیا گیا ہے۔ ذرائع کے مطابق سی بی آئی جلد ہی ریاستی پولیس سے کیس سے متعلق دستاویزات، شواہد اور تحقیقاتی رپورٹس اپنے قبضے میں لے گی۔ اس کے بعد گواہوں سے دوبارہ جرح کی جائے گی، تکنیکی شواہد کا جائزہ لیا جائے گا اور واقعات کی ترتیب میں نئی کڑیوں کو جوڑنے کاکام کیا جائے گا۔

حکومت کا کہنا ہے کہ سی بی آئی تحقیقات سے معاملے میں شفافیت بڑھے گی اور متاثرہ فریق کو منصفانہ تحقیقات میں اعتماد ملے گا۔ وہیں اس فیصلے کے بعد معاملے میں مزید کارروائی اب سی بی آئی جانچ رپورٹ پر انحصار کرے گی۔ سرخیاں میں رہا اتراکھنڈ کے انکیتا بھنڈاری قتل کیس ایک بار پھر بحث میں آ گیا ہے۔ تقریباً 3 سال قبل رشی کیش کے نزدیک واقع ونتارا ریزورٹ میں ریشپسنسٹ کے طورپر کام کررہی انکیتا کے قتل سے ریاست بھر میں بڑے پیمانے پر غم و غصہ پھیل گیا تھا۔ انصاف کے لئے جگہ جگہ احتجاجی مظاہرے پھوٹ پڑے۔ تقریباً ایک ماہ قبل ارمیلا سناور کی ایک نئی ویڈیو منظر عام پر آئی جس نے اس معاملے کو پھر سے سرخیوں میں لا دیا۔ ویڈیو میں مبینہ طور پر ایک ’وی آئی پی‘ کا حوالہ دیا گیا تھا اور کچھ بی جے پی رہنماؤں پر بھی سنگین الزامات لگائے گئے تھے۔

ویڈیو وائرل ہونے کے بعد انکیتا کی والدہ سونی دیوی نے اپنے ردعمل میں کہا تھا کہ جس کے پاس بھی اس کیس سے متعلق ٹھوس ثبوت ہوں، انہیں براہ راست عدالت میں پیش کرنا چاہئے۔ انہوں نے کہا کہ ان کا کسی سیاسی جماعت سے کوئی تعلق نہیں ہے۔ ان کی ترجیح صرف اپنی بیٹی کو انصاف دلانا ہے۔ انہوں نے زور دے کر کہا کہ یہ ضروری ہے کہ سچائی سامنے لائی جائے تاکہ مجرموں کے خلاف قانون کے تحت کارروائی کی جا سکے۔

سونی دیوی نے اپنا درد بیان کرتے ہوئے کہا تھا کہ ان کی بیٹی پر ایک بااثر شخص کے دباؤ میں غلط کام کرنے کا دباؤ بنایاگیا تھا۔ جب اس نے انکار کیا تو اسے جان سے ہاتھ دھونا پڑا۔ ان کے بقول یہ معاملہ محض قتل کا نہیں ہے بلکہ خواتین کی عزت اور تحفظ کا مسئلہ ہے۔ عدلیہ پراعتماد کا اظہار کرتے ہوئے انہوں نے کہا کہ غیر جانبدارانہ تحقیقات سے حقیقت سامنے آئے گی اور ذمہ داروں کو سزا ملنی چاہیے، خواہ ان کا اثر و رسوخ کچھ بھی ہو۔