امریکہ: ٹرمپ کے خلاف امریکی عوام میں زبردست غصہ، پالیسیوں کی مخالفت میں سینکڑوں شہروں میں احتجاجی مظاہرے

صدر ڈونالڈ ٹرمپ کے خلاف امریکی عوام کا غصہ دن بہ دن بڑھتا ہی جا رہا ہے۔ اس سلسلے میں ہفتہ کو ایک بار پھر مظاہرین کا سیلاب امڈ پڑا۔ حال میں یہ دوسرا موقع ہے جب ملک میں ٹرمپ کے خلاف اتنا بڑا مظاہرہ ہوا ہے۔ یہ مظاہرے واشنگٹن سمیت امریکہ کے سینکڑوں شہروں میں ٹرمپ کی غلط پالیسیوں کے خلاف کیے گئے۔

نیویارک میں مظاہرین نے شہر کی اہم لائبریری کے باہر جمع ہوکر ’نو کنگس اِن امریکہ‘ (امریکہ میں کوئی راجہ نہیں) اور ‘Resist Tyranny’ (تاناشاہی کی مخالفت کرو) جیسے نعروں والے پوسٹر اور بینر لے کر مظاہرہ کیا۔

ان مظاہروں میں زیادہ تر غصہ ٹرمپ کی امیگریشن پالیسی کے خلاف تھا۔ لوگ زور زور سے نعرے لگا رہے تھے ‘No ICE, no fear, immigrants are welcome here’ (نا آئی سی ای، نہ خوف، تارکین وطن کا استقبال ہے)۔ یہ نعرہ امریکی امیگریشن ایجنسی یعنی آئی سی ای یعنی امیگریشن اینڈ کسٹمز انفورسمنٹ کی مخالفت میں تھا، جو غیر قانونی تارکین وطن کو حراست میں لیتی ہے۔

واشنگٹن ڈی سی میں مظاہرین نے ٹرمپ انتظامیہ پر آئینی اصولوں، خاص کر ’انصاف کے عمل‘ کے حق کو کمزور کرنے کا الزام لگایا۔ رپورٹ کے مطابق وہائٹ ہاؤس کے باہر مظاہرہ کر رہے 41 سالہ بنجامن ڈگلس نے کہا، ’’یہ انتظامیہ قانون کی حکمرانی اور شہریوں پر ظلم نہ کرنے کے بنیادی تصور پر سیدھا حملہ کر رہی ہے۔‘‘ ڈگلس نے فلسطینی حامی طالب علم خلیل کی رہائی کی مانگ کرتے ہوئے ایک پوسٹر پکڑا ہوا تھا۔ انہوں نے کہا کہ کچھ لوگوں کو جان بوجھ کر نشانہ بنایا جا رہا ہے تاکہ ’غیر ملکی مخالفت‘ کو بھڑکایا جا سکے اور طویل عرصے سے چلے آ رہے قانونی تحفظ کو کمزور کیا جا سکے۔

نیو یارک کی ایک دیگر احتجاجی کیتھی ویلی (73 سال)، جو ہولوکاسٹ سے بچے لوگوں کی بیٹی ہیں، نے کہا، ’ہم بہت خطرے میں ہیں‘، انہوں نے کہا، ’میرے ماں-باپ نے ہٹلر کے عروج کی کہانیاں سنائیں، وہ آج ٹرمپ کے دور سے میل کھا رہی ہیں۔ فرق بس اتنا ہے کہ ٹرمپ، ہٹلر یا دیگر فاسسٹ رہنماؤں کے مقابلے میں زیادہ بیوقوف ہیں۔ انہیں بس استعمال کیا جا رہا ہے اور ان کی خود کی ٹیم میں ہی پھوٹ ہے۔‘

بالٹیمور میں جان ہاپکنس یونیورسٹی میں امیونولوجی کی پی ایچ ڈی کی طالبہ (26) ڈینیلا بٹلر نے ٹرمپ انتظامیہ کے ذریعہ سائنس اور پبلک ہیلتھ فنڈنگ میں کٹوتی پر تشویش ظاہر کرتے ہوئے کہا کہ جب سائنس کو نظر انداز کیا جاتا ہے تو لوگ مرتے ہیں۔ ان کے ہاتھ میں ٹیکساس کا ایک نقشہ تھا جس پر حال کے خسرہ وبا کے مقام ظاہر کیے گئے تھے۔