اتر پردیش: مریض کی موت کے بعد اسپتال میں ہنگامہ، اہل خانہ نے ڈاکٹروں پر لگایا لاپروائی کا الزام

اتر پردیش کے آگرہ واقع جی آر اسپتال میں علاج کے دوران ایک مریض کی موت ہو گئی جس کے بعد اہل خانہ نے اسپتال میں زبردست ہنگامہ اور توڑ پھوڑ کیا۔ انھوں نے ڈاکٹروں پر لاپروائی برتنے اور علاج کے لیے زیادہ رقم وصول کرنے کا الزام عائد کرتے ہوئے ملازمین کی بھی پٹائی کر دی۔ جی آر اسپتال کے مالک اور سماجوادی پارٹی کے سابق رکن اسمبلی راجیندر سنگھ نے اس تعلق سے کہا کہ مریض ناہر سنگھ کو 19 جولائی کو سنگین حالت میں داخل اسپتال کیا گیا تھا۔ انھیں ایس این میڈیکل کالج سے یہاں منتقل کیا گیا تھا۔ مریض کو تین ہفتے سے زیادہ وقت تک آئی سی یو میں ہائی آکسیجن فلو پر رکھا گیا تھا کیونکہ انھیں سانس لینے میں بہت زیادہ دقت تھی۔

راجیندر سنگھ نے مزید بتایا کہ مریض گزشتہ تین دنوں سے وینٹی لیٹر پر تھا۔ مریض کے اہل خانہ کو ان کی غیر مستحکم طبیعت کے بارے میں لگاتار بتایا جاتا تھا۔ جمعرات کو علاج کے دوران ہی ناہر سنگھ کی موت ہو گئی۔ اس کے بعد مہلوک کے گھر والوں نے الزام لگانا شروع کر دیا کہ ڈاکٹروں کی لاپروائی کی وجہ سے ہی مریض کی موت ہوئی ہے۔ ساتھ ہی انھوں نے اسپتال میں توڑ پھوڑ شروع کر دی۔

اسپتال کے مالک کا کہنا ہے کہ "مریض کے رشتہ داروں نے داخلی دروازہ کے ساتھ ساتھ اسپتال میں شیشے کی کھڑکیوں کو بھی توڑ دیا۔ ڈاکٹروں اور دیگر ملازمین کی پٹائی بھی کی گئی۔ میں نے مناسب کارروائی کے لیے تاج گنج پولس اسٹیشن کو تحریری شکایت بھیج دی ہے۔ ان کی بریریت کا نظارہ سی سی ٹی وی کیمرے میں بھی قید ہو گیا ہے۔"

اس واقعہ کے تعلق سے تاج گنج ایس ایچ او نریندر سنگھ کا کہنا ہے کہ "معاملے کی جانچ کی جا رہی ہے۔ سبھی باتوں کی جانچ کرنے کے بعد ایک ایف آئی آر درج کی جائے گی۔ ہم مہلوک کے اہل خانہ کے اراکین سے بھی رابطہ کر رہے ہیں۔"