یوپی: لاء مارٹینیر کالج کی دو طالبات کورونا پازیٹو، خوف کا عالم، کیمپس بند

اتر پردیش کے لکھنؤ واقع مشہور لاء مارٹینیر گرلس کالج میں دو طالبات کے کورونا پازیٹو ہونے کے بعد دو دن کے لیے کیمپس بند کر دیا گیا ہے۔ دونوں طالبات میں سے ایک درجہ 2 اور ایک درجہ 6 میں پڑھتیں ہیں اور دونوں بہنیں ہیں۔ طالبات کے والدین نے اتوار کو اسکول کی پرنسپل آشریتا داس کو اپنے بچوں کے کورونا پازیٹو ہونے کے بارے میں مطلع کیا تھا۔ داس نے کہا ’’ہم نے دو دنوں کے لیے اسکول بند کر دیا ہے۔ کوئی بھی آن لائن یا آف لائن کلاس دو دنوں تک نہیں ہوگی۔ ہم لکھنؤ اور میونسپل کارپوریشن سے احاطہ کو پوری طرح سے سینیٹائز کرنے کی گزارش کر رہے ہیں۔‘‘

آشریتا داس نے کہا کہ پیر کو ہونے والا بورڈ امتحان اسکول احاطہ کو پوری طرح سے سینیٹائز کرنے کے بعد منعقد کیا جائے گا۔ حالانکہ ریاست کا محکمہ صحت دو متاثرہ طالبات کے رابطوں کو ٹریس کر رہا ہے اور ان سبھی لوگوں کی ٹیسٹنگ ہو رہی ہے جو ان کے رابطے میں آئے تھے۔ لکھنؤ کے ڈپٹی چیف میڈیکل افسر ملند وردھن نے کہا کہ ’’ہم پیر اور منگل کو اسکول بند ہونے پر احاطہ کو سینیٹائز کریں گے۔ پرنسپل ہمیں ان لوگوں کی فہرست بھی دیں گے جو بچوں کے رابطے میں آئے ہوں گے۔‘‘ انھوں نے کہا کہ ’’طالبات کے والدین بھی کورونا پازیٹو ہیں، لیکن چار لوگوں میں سے کسی نے کوئی بھی سفر نہیں کیا ہے۔ طالبات میں سردی کی ہلکی علامتیں ہونے کے بعد کنبہ نے ٹیسٹ کرایا تو چاروں کورونا پازیٹو پائے گئے۔‘‘