تمل ناڈو: لوک سبھا انتخابات کے لیے ڈی ایم کے نے کیا 21 امیدواروں کا اعلان، انتخابی منشور جاری

پارٹی نے ریاست میں باقی 18 سیٹیں دیگر اتحادیوں بشمول کانگریس، بائیں بازو کی پارٹیوں اور وی سی کے کو الاٹ کی ہیں۔ ڈی ایم کے نے انتخابات کے لیے امیدواروں کی پہلی فہرست کے ساتھ اپنا منشور بھی جاری کیا، جس میں گورنروں کی تقرری اور آرٹیکل 356 کی منسوخی جیسے موضوعات کا بھی احاطہ کیا گیا ہے۔

تمل ناڈو میں حکمراں جماعت نے جن 21 امیدواروں کو میدان میں اتارا ہے ان میں سے 11 نئے چہرے ہیں۔ جنوبی چنئی کے موجودہ ایم پی تمیزاچی تھنگاپانڈیان سمیت تین خواتین کو بھی ٹکٹ دیا گیا ہے۔ ڈی ایم کے نے دیاندھی مارن، ایس۔ جگت رکشکن، کالاندھی ویراسوامی، کتھیر آنند اور سی این اننادورائی کو دوبارہ امیدوار بنایا گیا ہے۔

ڈی ایم کے نے اپنے منشور میں گورنروں کی تقرری پر ریاستوں سے مشاورت کرنے کا اقدام اٹھانے، آرٹیکل 356 (جو مرکز کو ریاستی حکومت کو برخاست کرنے کی اجازت دیتا ہے) کو ختم کرنے اور پڈوچیری کو ریاست کا درجہ دینے کا وعدہ کیا ہے۔