’شاہ نے راز کو اور گہرا کر دیا‘، دھنکھڑ ایک مہینے سے رابطے سے باہر کیوں؟ جے رام رمیش نے حکومت سے پوچھے سوال

سابق نائب صدر جمہوریہ جگدیپ دھنکھڑ کو لے کر وزیر داخلہ امت شاہ نے پیر کو ایک بیان دیا، اس پر کانگریس رہنما جے رام رمیش نے اپنے رد عمل کا اظہار کیا ہے۔ دراصل امت شاہ نے کہا تھا کہ اپوزیشن کو نائب صدر جمہوریہ کے استعفیٰ پر ہنگامہ نہیں کرنا چاہیے، اس کہانی میں اور بھی کچھ ہو سکتا ہے۔ اس پر کانگریس رہنما نے دھنکھڑ کے اصول و آداب، اور پروٹوکال پر عمل کرنے اور کسانوں کی فلاح اور عدالتی جوابدہی کے لیے بے خوف ہو کر بولنے کی تعریف کی۔

جے رام رمیش نے اپنے ’ایکس‘ پوسٹ میں کہا، ’’آج وزیر داخلہ نے اور بھی کچھ کہنے کی کوشش کی ہے۔ لیکن انہوں نے صرف راز کو اور گہرا کر دیا ہے۔ اس بات کی کوئی وضاحت نہیں ہے کہ کسانوں کے مفاد کی وکالت کرنے والے ناقابل تسخیر اور پُرجوش دھنکھڑ ایک مہینے سے بھی زیادہ وقت سے پوری طرح سے رابطہ سے باہر کیوں ہیں۔‘‘

کانگریس رہنما نے مزید کہا کہ جگدیپ دھنکھڑ نے 21 جولائی 2025 کی رات کو اچانک اور غیر متوقع طور پر ہندوستان کے نائب صدر جمہوریہ کے عہدہ سے استعفیٰ دے دیا۔ یہ غیر معمولی واقعہ تھا۔ ایک دن بعد وزیر اعظم نے صرف ان کی اچھی صحت کی تمنا کی۔ مودی اور شاہ پر براہ راست حملہ کرتے ہوئے جے رام رمیش نے لکھا- ’’استعفیٰ کا یہ پورا معاملہ واقعی عجیب ہے اور یہ ظاہر کرتا ہے کہ جی2 کیسے کام کرتا ہے۔‘‘

واضح رہے کہ وزیر داخلہ امت شاہ نے جگدیپ دھنکھڑ کے استعفیٰ کو زیادہ طول نہ دینے کا انتباہ کرتے ہوئے کہا کہ ہمیں اس سب کا بتنگڑ نہیں بنانا چاہیے۔ انہوں نے لوگوں سے دھنکھڑ کے آئینی کردار اور ان کے عہدہ چھوڑنے کے فیصلے کا احترام کرنے کی گزارش کی۔

شاہ نے کہا کہ دھنکھڑ صاحب کا استعفیٰ نامہ اپنے آپ میں واضح ہے۔ انہوں نے اپنے استعفیٰ کے لیے صحت وجوہات کا حوالہ دیا ہے۔ انہوں نے اپنی مدت کار کے لیے وزیر اعظم، دیگر وزرا اور حکومت کے اراکین کا تہہ دل سے شکریہ ادا کیا۔