ای ڈی کے سمن نظرانداز کرنے کا معاملہ، کیجریوال اور امانت اللہ خان عدالت سے بری

نئی دہلی: دہلی کی راؤز ایونیو کورٹ نے انفورسمنٹ ڈائریکٹوریٹ کے سمن سے متعلق معاملات میں دہلی کے سابق وزیر اعلیٰ اروند کیجریوال اور عام آدمی پارٹی کے رکن اسمبلی امانت اللہ خان کو بری کر دیا ہے۔ یہ فیصلہ راؤز ایونیو کورٹ کے ایڈیشنل چیف جوڈیشل مجسٹریٹ پارس دلال نے سنایا۔ عدالت نے کہا کہ استغاثہ ملزمان کے خلاف الزامات کو اس حد تک ثابت نہیں کر سکا کہ انہیں مجرمانہ ذمہ داری کا سامنا کرنا پڑے۔

عدالت نے جمعرات کو شراب پالیسی سے جڑے معاملے میں ای ڈی کے سمن پر پیش نہ ہونے کے الزام میں کیجریوال کو بری کیا۔ اسی طرح دہلی وقف بورڈ میں بھرتیوں سے متعلق منی لانڈرنگ کیس میں ای ڈی کے سمن پر حاضر نہ ہونے کے معاملے میں امانت اللہ خان کو بھی راحت ملی۔ عدالت کے مطابق سمن کی تعمیل نہ کرنے کے الزامات میں قانونی تقاضوں اور شواہد کا باریک بینی سے جائزہ ضروری ہے، جو اس معاملے میں پورا نہیں ہوا۔

ای ڈی نے فروری 2024 میں کیجریوال کے خلاف راؤز ایونیو کورٹ میں عرضی داخل کی تھی۔ ایجنسی کا الزام تھا کہ کیجریوال نے پریوینشن آف منی لانڈرنگ ایکٹ کی دفعہ 50 کے تحت جاری سمن کو جان بوجھ کر نظرانداز کیا اور تفتیش میں شامل ہونے سے گریز کیا۔ ای ڈی کا کہنا تھا کہ کئی مواقع دیے جانے کے باوجود پیشی نہ ہونا قانون کی خلاف ورزی ہے۔

یہ جانچ سی بی آئی کی جانب سے 17 اگست 2022 کو درج مقدمے کے بعد شروع ہوئی تھی، جو 2021-22 کی دہلی آبکاری پالیسی میں مبینہ بے ضابطگیوں سے متعلق تھا۔ یہ مقدمہ 20 جولائی 2022 کو لیفٹیننٹ گورنر وی کے سکسینہ کی شکایت پر درج ہوا تھا۔ اس کے بعد ای ڈی نے 22 اگست 2022 کو منی لانڈرنگ کے زاویے سے مقدمہ قائم کیا۔

ای ڈی کے مطابق آبکاری پالیسی معاملے میں کیجریوال اور عام آدمی پارٹی پر ’ساؤتھ گروپ‘ نامی کارٹیل سے رشوت لینے کے الزامات ہیں، جس پر دارالحکومت میں شراب کی فروخت اور تقسیم کو متاثر کرنے کا دعویٰ کیا گیا۔ اس معاملے میں کیجریوال کو ای ڈی نے گرفتار بھی کیا تھا، تاہم بعد میں سپریم کورٹ سے انہیں ضمانت مل گئی۔