تمل ناڈو میں پی ایم مودی اور آر ایس ایس پر راہل گاندھی کا شدید حملہ

کانگریس لیڈر راہل گاندھی نے پیر کے روز تمل ناڈو میں عوام سے مخاطب کرتے ہوئے کہا کہ ’’تمل ناڈو میں ایسا شخص حکومت کرے گا جو صحیح معنوں میں تمل ثقافت اور اس کے لوگوں کی نمائندگی کرتا ہو۔‘‘ تمل ناڈو میں اسمبلی انتخابات کے پیش نظر انتخابی تشہیر کے لیے راہل گاندھی تمل ناڈو دورہ پر ہیں اور انھوں نے آج کنیاکماری میں ایک روڈ شو کے دوران مذکورہ خیال ظاہر کیا۔

اپنے تین روزہ دورہ کے دوران راہل گاندھی نے وزیر اعظم نریندر مودی کو کئی مواقع پر تنقید کا نشانہ بنایا۔ آج بھی انھوں نے پی ایم مودی اور آر ایس ایس پر شدید حملہ کرتے ہوئے لوگوں سے اپیل کی کہ وہ پی ایم مودی اور آر ایس ایس فیملی کو ریاست کی ثقافت اور روایات کی بے عزتی کرنے کی اجازت قطعی نہ دیں۔ انھوں نے کہا کہ تمل ناڈو کی ثقافت اور روایات کا تحفظ ان کی ذمہ داری ہے۔

راہل گاندھی نے روڈ شو کے دوران کہا کہ بی جے پی اراکین اسمبلی کو خریدنے ور جمہوریت کو تباہ کرنے کی کوشش میں لگا ہوا ہے اور کنیاکماری کے لوگوں کو بھگوا خیمہ کے اس ناپاک منصوبے سے محتاط رہنا چاہیے۔ انھوں نے پڈوچیری میں بی جے پی کے ذریعہ کیے گئے سیاسی ڈرامہ کے بارے میں بھی لوگوں کو یاد دلایا اور کہا کہ بھگوا پارٹی نے پڑوسی ریاست میں جمہوریت کی دھجیاں اڑائی ہیں۔

راہل گاندھی نے اس دوران آنجہانی ایچ. وسنت کمار کو خراج عقیدت بھی پیش کی، جو کنیاکماری کے رکن پارلیمنٹ تھے اور کووڈ-19 کے سبب ان کا انتقال ہو گیا تھا۔ کانگریس لیڈر نے کہا کہ وسنت کمار پہلے ایک کانگریسی تھے اور انھوں نے کنیاکماری لوک سبھا سیٹ جیتی۔ راہل گاندھی نے کانگریس کارکنان سے ان کی وراثت کو آگے بڑھانے اور اتحاد کے ساتھیوں کو ایک بڑا مینڈیٹ دینے کی اپیل کی۔