پی ایم مودی کے بھائی کا جنتر-منتر پر مظاہرہ، ملک میں مغربی بنگال راشن ماڈل نافذ کرنے کا مطالبہ

وزیر اعظم نریندر مودی کے بھائی اور آل انڈیا فیئر پرائس شاپ ڈیلرس فیڈریشن (اے آئی ایف پی ایس ڈی ایف) کے نائب سربراہ پرہلاد مودی نے آج جنتر-منتر پر مرکزی حکومت کے خلاف احتجاجی مظاہرہ کیا۔ آل انڈیا فیئر پرائس شاپ ڈیلرس فیڈریشن کی طرف سے کچھ مطالبات کے پیش نظر پرہلاد مودی اور تنظیم کے دیگر اراکین جنتر-منتر پر اکٹھا ہوئے اور نعرہ بازی کی۔ اس دوران انھوں نے کہا کہ اے آئی ایف پی ایس ڈی ایف کا نمائندہ وفد جلد ہی وزیر اعظم نریندر مودی کو ایک عرضداشت پیش کرے گا۔ انھوں نے بتایا کہ عرضداشت میں تنظیم کے مطالبات کو فہرست بند کیا جائے گا اور ان سے وزیر اعظم کو مطلع کرایا جائے گا۔

دراصل اے آئی ایف پی ایس ڈی ایف کے 9 مطالبات ہیں جن میں مناسب شرح کی دکانوں سے فروخت کیے جانے والے چاول، گیہوں اور چینی کے ساتھ ہی خوردنی تیل اور دالوں پر ہونے والے نقصان کے لیے معاوضے کا مطالبہ بھی شامل ہے۔ اس کے علاوہ وہ مفت تقسیم کے مغربی بنگال راشن ماڈل کو پورے ملک میں نافذ کیے جانے کا بھی مطالبہ کر رہے ہیں۔ پرہلاد مودی کا کہنا ہے کہ اے آئی ایف پی ایس ڈی ایف بدھ کو قومی مجلس عاملہ کی میٹنگ کرے گا، جس میں آگے کی پالیسی طے کی جائے گی۔