ایم ایل اے نے یوگی حکومت پر لگائے الزام، اسمبلی میں جذباتی ہوکر کہا ’مجھےاور میرے بیٹے کو بھی قتل کر دیا جائے گا‘

اتر پردیش اسمبلی میں بدھ کے روز اس وقت ماحول جذباتی ہو گیا جب سماج وادی پارٹی (ایس پی) کی ممبراسمبلی وجما یادو نے اپنے شوہر جواہر یادو کے قتل کا معاملہ اٹھایا اور حکومت پر ملزمین کو جیل سے باہر نکلوانے کا الزام لگایا۔ ایس پی ممبر اسمبلی نے کہا کہ اب ان کی اور ان کے بیٹے کی جان کو خطرہ ہے، انہیں کب انصاف ملے گا؟

ایس پی ایم ایل اے وجما یادو نے اسمبلی میں تقریر کرتے ہوئے اسپیکر سے کہا کہ وہ ذاتی طور پراپنی بات کرنا چاہتی ہیں۔ انہوں نے کہا کہ میرے شوہر جواہر یادو کو قتل کر دیا گیا، اس پر اسپیکر ستیش مہانا نے کہا کہ یہ معاملہ عدالت میں زیر سماعت ہے... یہ معاملہ کئی باراٹھایا جا چکا ہے، اس سلسلے میں ہائی کورٹ کا فیصلہ ہونا ہے، آپ ہائی کورٹ میں یہ باتیں رکھیں۔ ہم یہاں عدالت کے کسی فیصلے پر بحث نہیں کر سکتے۔

اسپیکر کے جواب پر وجما دیوی جذباتی ہو گئیں اور کہنے لگیں کہ میں بار بار اپنی بات کہوں گی کیونکہ ہمیں انصاف نہیں مل رہا ہے۔ ہمارا بھی قتل ہو جائے گا، ہمارے بیٹے اور بیٹی کو قتل کر دیا جائے گا۔ میرے شوہر کو قتل کرنے والوں کو نہ ہائی کورٹ نے ضمانت دی ہے اور نہ ہی سپریم کورٹ نے۔ حکومت نے ایک ماہ تک پیروی کی اور دعویٰ کیا کہ کپل کروریا کی بیٹی کی شادی ہے۔ بیٹی کی شادی ہوگئی، پھر بھی حکومت نے ایک مہینہ بڑھا دیا اور اُدے بھان کروریا کو بھی حکومت نے چھوڑ دیا۔

ستیش مہانا نے کہا کہ حکومت رہا نہیں کرتی، عدالت رہا کرتی ہے۔ کون آدمی ہے جوعدالت کے بغیر چھوٹ سکتا ہے؟ اس پرایس پی ایم ایل اے نے کہا کہ عدالت نے رہا نہیں کیا، سر، حکومت نے چھوڑا ہے، پھرمیرا اور میرے بیٹے کا قتل ہوگا، تو ذمہ داری! اسمبلی بتائے کہ اگر کل کچھ ہوگیا تو... ایسے کھلے عام گھوم رہے ہیں... آپ کو میری بات کو بار بارسننا پڑے گا۔

اس کے بعد اپوزیشن لیڈر ماتا پرساد پانڈے بھی کھڑے ہوئے اور انہوں نے اسپیکرسےایس پی ایم ایل اے کو سیکورٹی فراہم کرنے کا مطالبہ کیا اور کہا کہ انہیں سیکورٹی دلوا دیجئے۔ اس پراسپیکر نے اتفاق کرتے ہوئے کہا کہ سکیورٹی فراہم کی جائے گی، آپ کو کچھ نہیں ہوگا، حکومت بھی اس کا خیال رکھے گی۔

بتا دیں کہ سماجوادی پارٹی لیڈر جواہر یادو کے قتل کالزام بی جے پی کے ٹکٹ پر دو بار ممبر اسمبلی رہ چکے اُدے بھون کروریا پر لگا تھا۔ جولائی 2024 میں یوپی حکومت نے اُدے بھان کروریا کو ان کے اچھے اخلاق کی وجہ سے معاف کر دی اوروہ جیل سے باہر آگئے۔ وجما دیوی پہلے بھی اس معاملے کو ایوان میں اٹھا چکی ہیں۔